聖誕假兩天玩樂小記

22 Dec 15 冬至，爸爸買飛入迪迪尼玩。所以，呢日我地齊齊去迪迪尼放下電。趁著STAR WAR熱潮，迪迪尼出動埋白武士。甫出場，已經引黎大班FANS，幾咁艱辛，Isaac 先可以埋身影張單人合照。

至於Claire，就扮賊人，比人通輯。

冬天去迪迪尼，好有氣氛，因為放煙花前，會大放飄雪。Claire 好開心呀，睇下媽咪成個頭都係雪呀⋯⋯可惜爸爸哥哥去左玩巴斯光年，差唔多飄哂雪先出黎睇。有點可惜喔。

24 Dec 15 平安夜，無乜節目，爸爸又返工。要避開出尖咀既人群，媽媽索性留守屋企附近玩。所以，我地去左濕地。嘩，睇幅相，就知呢日又忽然好熱好曬。末日既天氣真係多變幻。

好在我地去濕地，旨在呢個遊樂場姐。

Isaac： 嘩，我個頭頂住個頂呀⋯⋯

Isaac: 阿妹，SIR完呢條滑梯，我地鬥快上樹屋吖。

睇返D相，原來呢個媽媽真係好勤力，四出帶仔女去玩。唔怪得身邊朋友都好讚嘆媽媽既厲害啦。唔知掉返轉，爸爸會好勤力帶去玩定帶去行街買金魚呢，哈哈。

跳繩小花絮

20 Dec 15 Isaac 呢個月有出去仁愛堂繼續玩下花式跳繩，進度係點，睇下咪知。呢堂不停學跳大繩。孖繩前後FING落黎，其實少D功力真係應付唔到。Isaac 第一次試呢種花式，算係咁啦（按此）。

除左呢種花式，Isaac 呢堂仲好努力試緊大繩後跳。條繩由後面FING上黎。其實呢D真係靠熟習，唔係真係唔識比反應。（點此）

21 Dec 15 聖誕節，周圍都係裝飾，仲有少少童真既Isaac, 一見FOREVER FRIENDS熊，就走埋去要照相。

升小後，成日恰個妹。難得主動攬住阿妹一齊合照。希望佢地大個可以一直相親相愛。

聖誕例牌GATHERING

19 Dec 15  一年一度聖誕GATHERING又到。我地由小朋友出世到而家，已經第七年出黎，亦都可能係最後一年。因為JASPER一家會移師返加拿大植根。之後大家唔知會唔會再見LU。

細細個都開始群埋男仔堆既Claire, 甫坐低，就同JASPER細佬好FRIEND。

Isaac: 我都同佢FRIEND啦⋯⋯

 梗係⋯⋯四大天王其中兩位一早FRIEND到打BAND。只餘ISAAC同ZAC埋唔到堆，咁梗係迫住同人地細路FRIEND啦，哈哈。

Isaac: 做乜篤爆我⋯⋯

成班細路最FRIEND係幾時？就係而家一齊扮鬼臉既時候，大家夾到無朋友。

忽然怪獸全部上身。

Claire: 我無你地咁核突⋯⋯我要保持形象。

濟濟一堂，大家相識好多年。唔知幾多年之後，會可以再咁一齊相聚。

屏山室內遊戲室

15 Dec 15 學校旅行後翌日，例牌係學校假期。礙於要接妹妹放學，所以計返，我地只係得早上少於兩小時自由活動時間。咁短時間，諗唔到去邊好，唯有近近地，去天水圍圖書館。次次去天水圍圖書館，有人都例牌要去樓下個室內遊戲室。

其實佢真係好耐無黎呢度玩了。而家咁高大，更加顯得格格不入。

Isaac: 我似唔似海獅呀？

難得入小學後，仲咁有童真。真係唔易。希望Isaac 仲可以繼續開開心心生活下去。

學校旅行

14 Dec 15 一年一度學校旅行，終於等到了。小一生可以有一個家長陪同，Isaac 就選左媽咪陪佢去玩。

Isaac: 係呀，我鐘意你吖嘛。 

Isaac: 不過你唔好影我啦⋯⋯唔⋯⋯

影完大合照，就各散東西自己自由活動先。媽媽初時諗住留意下Isaac 會同邊個玩啦⋯⋯吖，點知成程一個人，悶悶地咁。呢個時候，媽媽就覺得，應該由爸爸陪佢黎，因為爸爸都係大細路一名，好快會同班細路混熟。咁Isaac 就開心得多了。

Isaac: 都無人同我玩⋯⋯

小一生，真係行為令人咋舌。至少我未見過有小朋友咁盪千秋既⋯⋯跟住Isaac 又學人。暈！

玩到悶，捉Isaac 周圍行。比佢見到沙畫。唔知點解佢好鐘意玩沙畫。見佢咁悶，就比廿蚊出黎比佢玩下，Isaac 又好有心機整架喎。勞作果然係佢專長。

夠鐘返廣場集合玩班級遊戲。先黎玩個分組，老師叫兩個、三個、八個都好，各位同學要即時揾到人入組，入唔到組就輸。媽媽就睇見有兩個古惑男生，長期一齊，包無輸。咁都比佢地諗到，難怪佢兩個都係班中頭幾名的同學仔。

Isaac: 我地要扮到好似揾人咁架⋯⋯

Isaac：嘻嘻，我地玩到尾，都未輸過⋯⋯你知唔知點解吖？

之後，第二個亦都係最後一個遊戲，就係好似人地玩扔手巾咁。不過形式唔同左。想知點唔同法，就按此看下Isaac 同老師示範啦。

雖然媽咪無份玩，不過一直企側邊睇住佢地玩，都覺得好緊張呀⋯⋯

Isaac: 嘩⋯⋯就追到老師啦⋯⋯

輪到Isaac 點人了。

當然人地唔夠佢快，話咁快Isaac 就可以坐返低。

集體遊戲後，媽媽又捉左Isaac 去下室內體育館睇下有乜玩⋯⋯原來有個充氣彈床，不過望落好似唔多好玩。

所以，玩左一輪，有人走左去攀石⋯⋯以為側邊既教練會指導下。點知Isaac 吊住左好耐，個位哥哥仔都無走過黎。所以，全程最高點就係咁⋯⋯

之後，就走左去玩乒乓波。玩完之後，就嘈住話想學⋯⋯學下都好既，媽媽一向唔反對學野，識多樣野無壞，不過最緊要知道自己興趣係邊。

Isaac: 等我黎⋯⋯我手長D呀⋯⋯

Isaac: 等我開波先⋯⋯

兩個唔係好識打乒乓波既人好努力咁玩乒乓波。愚子可教也～～～

玩到差唔多集合時間，我地又走返出去準備集合回家。途中，有個人仔又學佢個同學咁坐千秋⋯⋯真係呢，升左小學，就係咁學人。真係無佢符。

Isaac: 我而家唔學囉⋯⋯我同晉軒一齊掃地⋯⋯

真係真係到走個下，Isaac 先開始同多少少同學混埋⋯⋯不過都走啦。當時，真係擔心佢係學校有無朋友呀⋯⋯

嘉智同學仔生日會

13 Dec 15 呢日Claire 同學仔請佢去生日會。遇著哥哥唔得閒，而Claire 又選左爸爸陪佢出席。所以，只有爸爸可以現場見証佢玩得有幾咁開心。

Claire: 嘩，正呀⋯⋯咁多人一齊衝落黎。

Claire: 呼呼⋯⋯好似坐船咁呀⋯⋯

 爸爸就用左慢鏡MODE，錄低左呢班瘋狂小朋友玩滑梯情況⋯⋯按此看下。

玩完遊樂場，可以同壽星仔影下相了。以前，Claire 同媽咪形容呢位同學仔係BB，因為佢好細粒喎⋯⋯時至今日，好似嘉嘉同學已經同Claire 一樣高了。

Claire: 唔係呀⋯⋯我高過佢架⋯⋯

 媽媽無出席生日會，聽爸爸講，Claire 玩呢個叠杯勝出左。所以，有一盒CRAYOLA顏色筆。

Claire: 原來棟杯仲高過我喎⋯⋯ 

Claire: 嘻嘻，我終於有自己既一盒顏色筆了。唔駛用阿哥個D⋯⋯

 玩飽就食野。點知有人扮老虎。

Claire: 唔係呀⋯⋯我同你玩下咋嘛⋯⋯

 食完野就準備切旦糕了。

Claire: 你睇個度，拎緊盒旦糕出黎呀⋯⋯ 

Claire: 嘉嘉，快D許願啦，我想快D食旦糕呀⋯⋯

聽爸爸講，當場環境好多小朋友，個個都搏哂命咁擠入去旦糕到⋯⋯搞到Claire 好迫，好辛苦喎。

Claire: 好迫呀⋯⋯做乜忽然咁多人架。

食完又玩遊戲，又有個小朋友勝出，拎左筒薯片返屋企。開心死佢。

Claire: 好野⋯⋯媽咪平時唔買薯片架，而家有得食⋯⋯YEAH！！

成班小朋友，有得玩有得拎，點會唔HAPPY吖～～

Claire: 係呀，臨走仲有小禮物TIM呀，開心死我呀⋯⋯

臨走，都要同壽星仔SAY GOODBYE。不過Claire 個款好似老大咁。笑死。