澳門金沙喜來登之功夫熊貓學堂

28 Nov 15 晨早，我地落樓下酒店食自助早餐。早餐好豐富⋯⋯不過掛住食忘記影相。食完超豐富早餐後，我地急步去漁人碼頭買另一套船飛，因為做活動可以加三十元買⋯⋯所以焗住呢朝先去買，鬼咁趕。趕頭趕命去到漁人碼頭，Claire 見咁靚景，係都要影返張相留念。

Claire: 影得我靚D呀⋯⋯

雖則話好早，但個度都滿佈遊人。大家都企係條橋影相。

衝衝忙忙，我地都叫做趕到返去功夫熊貓學堂⋯⋯遲到個位。好在趕得切開始之先出現，否則未必有得玩了。甫開始，大家各自設計功夫頭帶。

頭帶其實好簡單，果然係比小朋友玩⋯⋯可能Isaac 都覺得幼稚了。

Claire: 我個款似唔似打功夫吖⋯⋯

搞完一輪，又玩遊戲。就係要向個發泡膠堆中揾返D食物出黎做拼盤。

Isaac: 喂，你比我睇下個牌有乜先得架⋯⋯
Claire: 我睇緊啦⋯⋯

兩兄妹夾手夾腳摷呀摷⋯⋯

終於擺齊哂碟沙律同面⋯⋯原來佢地係扮侍應，揾野食出黎比媽咪食。

之後，又到第二個遊戲，就係過河。以Isaac 體能，必定為佢個組取得高分啦。

估唔到，連Claire 都身手敏捷。

不過佢兩個身手好無用，呢個遊戲係個TEAMWORK，遇著佢條龍有兩三個BB。乜都拖返慢係後面⋯⋯好多人都睇到好肉緊呀⋯⋯ANYWAY，遊戲姐，旨在開心下。

之後，又另一個體能活動，就係要爬過呢條網路⋯⋯牛高馬大既Isaac，爬起上黎，會唔會難左少少呢？

Isaac: 嘩⋯⋯終於爬完⋯⋯

玩左個零鐘，終於完滿畢業了。由功夫熊貓出黎頒發畢業証書⋯⋯不過媽咪無影到，哈哈哈。

完場時，兩兄妹梗係唔願即走，再係個場玩下先。

Claire: YES⋯⋯好玩呀，下次我再黎玩過先⋯⋯

Isaac: 我學識左馬騮功呀⋯⋯

玩完哂，我地就整裝出發，去滑草也⋯⋯