15 Nov 15 呢日我地跟仁愛堂搞既親子旅行出發去睇保育離島。因為爸爸唔得閒，即刻再比錢婆婆一齊去玩下。點知原來呢日係遊船河黎架，成日加埋，坐左超過四個鐘頭船。真係坐到呆哂。兩婆孫合照。難得呢兩婆孫一齊去玩。
第一站我地去荔枝窩。荔枝窩原來係無荔枝架。反而出名係呢棵蟲蛀大樹。話蛀左咁大個洞，但棵樹仲可以䇄立不倒。
遠望都好大個洞呀，好似人地卡通片會爬隻松鼠出黎個D大樹咁。
其實荔枝窩好細架咋，一條路仔DOU哂落黎。不過好多本地團去，可能係海岸保育公園關係啦，所以呢度都好熱門下咁。我地見無乜好影，唯有影張炮相。
之後，就係呢檔獨巿士多，食左豆花。
除左豆花，仲有雞屎藤話係好出名⋯⋯但其實又唔覺有乜特別。可能獨巿所以出名啦。睇下呢兩兄妹個面目⋯⋯真係一個呆一個怒呀⋯⋯
之後，又上船，準備出發去吉澳午餐。上船前係岸邊同婆婆影張海邊照先。
到左吉澳，除左食飯，導遊仲帶左我地遊寺廟，不過我地興趣不大。反而導遊大力推介呢檔行到近廟既雞屎藤。話係檔主堅持自己整，而唔係向大陸拎貨喎⋯⋯同期導遊仲講，巿面上好多賣雞屎藤茶果既鋪頭（包括此島的其它鋪頭），因為成本問題，都由大陸買現成貨⋯⋯聽到之後，媽媽即刻諗起大澳個D茶果同埋流浮山個D囉⋯⋯
食飽飽，玩下呢日送既懷舊玩具先⋯⋯其實都考起媽媽點玩。因為媽媽無玩過架⋯⋯好在，無失禮人，最後都摸到點吹，仲教到兩兄妹玩TIM。
 |
| Claire: 睇下，幾大個幾咁通透⋯⋯ |
 |
| Claire: 哈哈哈，無人夠我咁大個⋯⋯ |
 |
| Claire: 你係咪都想玩呀？我再吹過比你吖。 |
 |
| Claire: 等我吹多個波比媽咪先⋯⋯ |
 |
| Isaac: 睇下，仲大過我個頭呀！ |
食完飯，又上船⋯⋯因為又要去下一站呀⋯⋯鴨州島。遠望，右邊流傳話似鴨眼洞喎。
不過上到岸，好明顯係一個地質海岸公園⋯⋯同期亦見到好多由海飄黎既垃圾TIM。
 |
| Claire: 我執到貝殼呀。 |
嘩，呢張相好似好懷舊呀⋯⋯顯得阿仔好大個咁，哈哈。
 |
| Claire: 媽咪，我發現左樣野呀⋯⋯ |
好了，遊完三個島： 荔枝窩、吉澳、鴨洲島，夾夾埋埋坐左三個幾鐘船，而家又係時候坐返成兩個鐘頭船返馬料水。咁長時間做乜好？就係食頭先係吉澳買既雞屎藤同埋糯米糍啦⋯⋯嘩，駛唔駛咁呀⋯⋯
 |
| Isaac： 嘻⋯⋯我學爸爸⋯⋯ |
 |
| 媽媽： 嘩⋯⋯你又學哥哥呀？ |
 |
| Claire: 唔係呀⋯⋯我好斯文架，我逐啖食架⋯⋯好似哥哥咁，會哽死架⋯⋯ |
沒有留言:
張貼留言