周末玩樂點滴

21 Nov 15 呢日爸爸話去東涌行街買野。爸爸未到之前，媽媽就帶左兩個小朋友去附近公園玩下。呢個公園幾好，設施唔係周圍都有。去開東涌，真係值得黎一黎放電。

呢次係第二次黎，人細膽大既Claire 話咁快爬左上呢個攀架屋⋯⋯之但係，上去容易落黎難，一上到頂望到咁低遠既媽媽，Claire 面都變哂，扁哂咀唔敢落。嚇死媽媽，幾辛苦至夾到佢落黎。之後再爬多次，跟住要等爸爸黎救佢。

Claire: 我都係爬呢個算啦，矮D，無咁驚。

 呢個公園，有個小草地斜坡，唔少外藉小朋友係度玩。Isaac 都好鐘意係度跑架。

兩兄妹齊齊跑，不過有個斜角位，一睇唔到，好易碌左落草坡，都少少危。

22 Nov 15 呢日完左教會，我地去左置樂食LUNCH。事後，例牌玩下置樂既多蚊公園。屯門好少千秋，幾難先排到兩架千秋齊齊玩。

大個女既Claire, 而家可以同哥哥齊齊玩千秋了。

Isaac: 不過仲係要人幫佢FING高呢⋯⋯ 

Claire: 乜姐⋯⋯人地細個吖嘛⋯⋯

周末兩日，日日都去玩⋯⋯似乎一點都唔似小學生生活囉。唔知幾時，Isaac 先會好似人地咁，成日要温書呢？