澳門大潭山滑草。路環葡撻。氹仔

28 Nov 15 玩完功夫熊貓，我地由酒店打的士去大潭山郊野公園去滑草⋯⋯有點兒驚既係，的士司機居然唔知個度有得滑草⋯⋯好在媽媽繼續堅持去大潭山。 最後，當然有草滑啦。

Isaac: 呼呼⋯⋯好玩呀⋯⋯

好耐無笑到四萬咁口既Isaac.

爸爸都有份玩⋯⋯不過好似爸爸開心過兩兄妹囉，唔信，按此睇下。

爸爸：嘩⋯⋯撞阿妹呀⋯⋯哇哈哈哈。

至於哥哥，雖然佢好開心，但好含蓄架⋯⋯無大叫架。又睇下係咪。

兩兄妹，齊齊滑，真開心。點此一齊開心下。

Isaac: 嘩⋯⋯我好似飛緊咁呀⋯⋯

至於Claire，就肯定係勁開心了。因為睇返D片，差唔多條條都有尖叫既⋯⋯但點解爸爸淨係會鬧阿哥尖叫既呢可⋯⋯（點此）

Claire: 因為爸爸錫我囉⋯⋯

輪到媽媽一齊玩⋯⋯又真係幾好玩既⋯⋯

不過滑到最底，要自己抬返上去，個下就辛苦囉⋯⋯

媽咪： 嘩⋯⋯點解會轉左架⋯⋯
Isaac: 嘩，BYE BYE⋯⋯

天氣實在太熱，唔容許我地玩咁耐⋯⋯兩兄妹玩到除哂衫，十一月底都咁熱，點搞⋯⋯最後，臨走係公園玩下秋千。

Claire: 我好熱呀⋯⋯

正當我地討論緊點返落山時，好在有架的士係公園度落客⋯⋯咁我地就順理成章搭返的士落車⋯⋯如果無人上黎玩，睇黎我地要搭11 號巴士落山底了。

下一站，直去路環個間至出名既葡撻店排隊買葡撻食。店內無位，我地買完坐係附近食。懶有氣氛咁。

明明我地望住塊貌似濕地既地方食架⋯⋯點解影相出黎，咁似垃圾崗既⋯⋯

爸爸其實買左半打葡撻加旦糕食⋯⋯我地食到好飽了。點知爸爸話再去食蟹粥⋯⋯又打的士去氹仔誠昌。其實媽媽唔係好識欣賞有幾鮮味，只係覺得堅貴，不過咁多年，爸爸每次去澳門，都例必要食。

Claire: 我可唔可以唔食呀⋯⋯我好眼瞓呀⋯⋯

Claire: 人地真係好眼瞓呀⋯⋯點解一定要食姐⋯⋯岩岩先食完旦糕⋯⋯
Isaac: 食啦⋯⋯爸爸話要就要架，無商量，唔係就會打架⋯⋯

食到好鬼飽既誠昌，出黎爸爸仲話買雪糕食。媽媽真係老了，唔夠佢地黎。

所以一家四口合照，只有三杯雪糕⋯⋯因為好飽呀，點會仲可以食得落架⋯⋯