澳門遊。喜來登金沙酒店。燒灰爐公園電動車場

27 Nov 15 爸爸成日話要去澳門玩下。一家四口，去住澳門酒店都幾難BOOK房，因為唔多酒店提供家庭房，就算幾經辛苦比我地揾到，但個價錢又唔得相宜。最後，只能接受喜來登金沙城酒店既家庭房。咁岩揾到間AGENT，係家庭房包兩位小朋友，加兩套來回船飛。咁我地只係額外買多兩套，就可以去玩一個WKEND。

CHECK IN去到，嘩，間房都幾靚喎。好舒服呀⋯⋯

超乾淨既TOILET。

同沖涼分開既，咁沖涼同方便就唔駛爭廁所用啦。

我地CHECK IN放低行李，就閃左出去澳門科學館⋯⋯殊不知，我地摸門釘，原來早幾日火警，所以，呢日係閉館維修。唉，千里迢迢黎到諗住科學館岩兩兄妹玩啦，點知而家乜都無得玩。好在仲有一個小CORNER比佢地自砌LEGO車咋。否則真係遊車河。

兩兄妹各自砌好車，準備比賽。

Claire: 希望我個架會贏啦。

 玩完一餐，其實我地未食LUNCH架。科學館方圓幾里都無野食咁，唯有靠裡面間M記。媽媽先同Claire 去食。中間有個小插曲，就係M記鑽地板⋯⋯我都唔明，明明有人坐，都要大大聲鑽爆個地板，搞到又嘈又成間餐廳都係塵土飛揚⋯⋯香港肯定唔會有呢D事發生囉。生意要緊架嘛。而係媽媽叫左Claire 坐定定唔好郁，等媽媽買野食回來時⋯⋯M記忽然大鑽地板，忽然係嘈到要掩耳避開⋯⋯加上塵沙飛起哂⋯⋯媽媽遠望著Claire , 嘩，好感動呀，Claire 真係唔離位，坐定定好驚好驚咁用雙手掩住雙耳（因為真係好好好爆嘈）。媽媽知道個刻，Claire 其實係好驚⋯⋯但佢好定，仲係唔離位，因為佢記得，媽媽臨走前，要佢坐定定唔可以周圍走⋯⋯呢個囡真係好抵錫呀。

之後，媽媽帶佢坐遠個沙塵位置⋯⋯

不過，食寶個粟米杯，媽媽都忍唔住帶佢離開M記，坐係科學館LEGO位置食。因為M記鑽地無停，沙塵嘈音不停有，好難頂。

之後，我地等巴士，等既期間，居然有個小娛樂，真係估你地唔到，咁都可以玩一餐。按此。

搭巴士去到燒灰爐公園電動賽車場。呢個節目，其實係媽媽諗住為哥哥安排的，因為佢鐘意渣車⋯⋯點知當值人員見哥哥咁大，話唔比玩喎。當下真係好失望呀⋯⋯好在Isaac 無發脾氣，好無奈咁跟住阿妹架車⋯⋯其實事後，媽媽係網上見到Isaac 幼稚園同學都去呢度⋯⋯仲可以渣車TIM。睇黎，真係好似當日現場居民咁講，Isaac 可以渣⋯⋯只係咁岩個位負責人唔比咋喎。

Claire: 哈哈，好好玩呀，我玩左兩次呀⋯⋯

 之後，我地去爸爸同事介紹既BUFFET食⋯⋯不過發覺好麻麻。後黎，係的士司機口中得知，去澳門食BUFFET，當地人一定會去最新開幕酒店個度食BUFFET，原因係新開幕，要打響名堂，BUFFET一定會好吸引。唔⋯⋯媽媽又學識一樣野了。下次黎澳門，一定會識選擇。

食完BUFFET都好夜，返酒店之先，就同明天玩伴影張合照先⋯⋯就係酒店送既功夫熊貓學堂。

Isaac: 唔知聽日好無玩呢⋯⋯

返到酒店，正當哥哥沖緊涼時，有隻馬騮忽然發作。

Claire: 我今晚瞓呢度⋯⋯

次次去酒店，兩兄妹最鐘意狂跳張床。因為平時無得咁放肆吖嘛。

Claire: 一齊上黎跳啦⋯⋯

Claire: 嘩⋯⋯張床咁勁呀⋯⋯好彈呀⋯⋯

呢日，雖然玩唔到媽媽計畫好既科學館同賽車，不過兩兄妹都好開心。好快就瞓著，迎接翌朝既功夫熊貓學堂。