母女失控

1 Mth 2 Day 呢朝阿惡女又發作， 半夜四點幾食完夜奶後， 發癲係咁大喊到中午12點幾一點。

Claire: 媽媽， 我瞓唔著呀

任憑媽媽同工人點抱， 阿囡都會忽然驚醒大叫狂喊。媽媽估可能係早兩晚爸爸餵夜奶時， 搏哂老命彈熟睡中的阿囡， 搞到佢呢幾日瞓覺都好驚。

滿左月既阿囡腳力唔可以睇少， 十分鐘喊到成個人歪哂， 睇下同上邊張相有乜唔同就知了。

喊到早上11點9個字， 媽媽頂唔順再不停站抱起放低抱起放低。比左個奶咀阿囡再比埋手佢捉實， 估唔到阿囡咁就瞓著左～～～～五分鐘咁多。半夜醒左搞阿囡到家下， 奶媽已經頭痛到屎， 諗住可以瞓下啦， 阿囡又好孝順囉， 即大喊醒左， 今勻奶咀都唔要了。

唯有又係抱。因為要餵人奶， 會攰D同埋又要顧住自己夠唔夠休息， 一唔夠瞓又少奶，到時阿囡唔飽又係咁喊。一諗起呢到， 加上自己呢晚無乜點瞓， 好頭痛， 加埋好似比人遺棄係屋企廿四小時忍住呢D大喊既精神折磨， 奶媽抱住阿囡忍唔住同阿囡一齊喊。好似人地產後抑鬱咁。

下午媽媽落左樓下食TEA， 由工人湊住一陣。點知之前明明講過唔可以用閃光燈， 媽媽都SET左熄左閃光燈既。但返黎媽媽睇相機， 見到閃光燈開左， 工人至講， 佢唔識熄閃光燈， 跟住仲搏命影， 原因係第一張有閃光， 咁咪繼續影睇下跟住點熄， 奶媽真係好想開口鬧佢。不過工人呢日走運， 因為奶媽心情不佳， 情緒低落， 鬧都費事鬧。但又係極唔開心囉。有乜理由媽媽SET左熄閃光燈， 工人自己走去開返至得架。

Claire: 工人姐姐， 媽媽叫左你唔好用閃光燈閃我架

Claire: 嘩， 你仲咁近對住我對眼黎閃。

Claire: 唔好再閃啦， 我好驚架～～～救命呀媽媽。

媽媽食完下午茶返黎見阿囡比閃光燈狂閃完， 覺得好可憐呀， 加上阿囡又大喊又要抱住瞓。奶媽又要迫住抱佢，抱佢又唔收聲， 跟住又諗起自己好慘， 繼婆婆比阿囡嚇走後， 而家好似淨返奶媽一個留係屋企廿四小時對住由朝喊到晚既阿囡，兩個一齊比人遺忘咁。跟住又抱住阿囡喊。唔知係阿囡知吖， 定咁岩， 兩次媽媽一喊， 阿囡就會收聲瞓著左。

到傍晚六點， 阿囡終於一覺瞓到晚上十點幾， 奶都唔記得食咁滯。奶媽又發夢， 唔通奶媽D 奶可以頂到四個鐘頭？？

1 Mth 3 Day 呢朝阿囡可以回復返早幾日既安靜啦， 奶媽真係開心。可以抖到一日。

Claire: 媽媽， 辛苦哂你， 我今日靜一日咁多啦。