點解阿囡越來越早起架

1 Mth Day 28 唔知做乜， 明明之前阿囡可以朝早六點左右至起身， 但呢個WK呢， 仲準時過鬧鐘， 五點已經開始嘈。囡呀囡， 你做乜咁早起呀？

Claire: 呢個問題我都要諗下點解

Claire: 你睇我諗到好苦惱啦， 我都未諗到。。。

1 Mth Day 29  Claire: 媽媽， 我今朝瞓得好少咋。我又就黎發作會狂喊架啦

呢日趁爸爸係度， 媽媽叫爸爸試一次點幫囡囡趴低， 因為之前媽媽試過， 嘩， 阿囡喊得仲厲害

Claire: 媽媽， 我好辛苦呀

Claire: 嘩～～～我頂唔順啦， 我要喊啦

搞到沖完涼都喊， 其實係喊眼瞓囉。阿囡第一次著裙仔， 媽媽見囡囡無乜頭髮， 幫佢帶頂帽啦， 點知阿囡仲喊得勁左。

帽仔好似唔襯件裙， 不如又試下條頭帶， 但仲怪相咁

都係乜都唔帶順眼D， 所以呢晚就係咁樣出街街。

1 Mth Day 30 Claire: 再影我相， 我就一拳打爛你個鏡頭架。

Claire: 嘻嘻， 講笑咋

接近兩個月大既囡囡， 成日都對住人笑， 已經對我地講野同笑有反應了。間唔時仲咦咦牙牙黎回應我地既講野。

Claire: 哈哈， 真係開心， 阿媽唔再淨係話我成日喊， 除左喊我仲成日笑架。

1 Mth Day 31 之前一日係咁喊足成日， 由朝早十一點到夜晚十一點都唔瞓， 喊呀喊呀， 足之搞到夜奶都唔食。夜晚十一點昏睡到半夜四點幾， 阿媽真係多謝哂你囉， 繼呢輪五點幾醒， 家下仲早左， 四點幾。

瞓左咁耐， 朝早一副好舒服既伸懶腰樣。

媽媽記得爸爸講過， 阿囡個時玩完呢個趴低玩意， 會好攰瞓得好快。阿媽梗係試下啦

第二次趴低， 阿囡個頭抬得耐左。

Claire: 我要努力抬起頭做人呀

可惜爸爸個套經驗APPLY唔到係阿囡身上， 玩完趴低， 只係瞓左半個鐘咋， 跟住喊功又發作， 做乜野架阿囡你。兩個月黎緊囉， 仲係咁難湊既。叫阿媽點放心返工。