奶媽病倒了

終於都病倒了， 係積勞成疾吖， 定係感親呢？ 應該兩樣都有掛。

話說週六晨早六點起身， 已經好攰， 不過其實日日都好攰， 所以無理到。跟住等到爸爸起身一家人出去食早餐時， 奶媽個頭已經少少痛痛地， 不過以為係攰， 無理佢。

中午煮午餐比阿仔食時， 個人簡直係攰到九彩， 個頭痛到爆， 可惜爸爸去左瞓覺， 留返奶媽一個人服侍大少午餐加埋等埋佢食完， 等個下呢， 真係奶媽忟到爆， 因為個頭就黎爆了。好啦， 等到頸都長， 又話要餵埋阿囡食奶了。做人奶媽都係唔易做， 爸爸同阿仔就瞓左， 奶媽就頭痛住去餵奶。一路餵對眼係已經好辛苦咁撐住， 唔係眼瞓， 係個頭千斤重咁比野壓住好辛苦好辛苦。跟住阿囡又喊， 一路等到四點奶媽至可以昏睡～～～跟住發現自己黎料了。

點解一路瞓一路覺得口乾又成身滾既呢， 好似發燒咁， 用手摸下自己個頭， 個頭係涼既不過對手係好熱， 所以都唔知自己個頭有無燒。一路係咁滾下滾下， 跟住又夠鐘要餵奶了。奶媽滾住咁抱起阿囡， 一抱就知自己真係發燒， 因為平時抱阿囡， 阿囡個頸係熱過奶媽隻手， 但呢次一抱，阿囡你好凍呀～～～～加上奶媽發覺除左頭痛， 家下仲開始骨痛PAT PAT 痛， 嘩， 好明顯係感冒跡象囉。

因為爸爸去左同阿仔返學， 奶媽唯有餵住奶等爸爸返黎， 問下健康既爸爸， 究竟奶媽有無燒。爸爸返黎一摸， 就話奶媽好滾。奶媽餵完奶，拎阿仔個探熱針一探， 38點幾度， 上網睇成人發燒OVER 37就係燒。咁即係奶媽係輕燒啦。

餵完奶， 奶媽個頭依然好痛， 爸爸好體貼咁帶左全屋最嘈既阿囡出街， 等媽媽可以同阿仔一齊再瞓下。可惜係阿仔唔會比媽媽瞓， 只會坐係隔離伊伊哦哦咁煩到你清醒， 呢一刻奶媽好想打比婆婆求救， 叫佢黎睇住阿仔， 因為奶媽好似就黎要死咁， 不過奶媽相信， 打比婆婆都無用， 婆婆只係拖到好夜至黎。忽然好掛住工人囉， 如果呢日工人唔休息就好了。

就係咁攤左係床聽住阿仔既煩音聽左一個鐘， 忽然全身出哂汗， 個人忽然好精神喎， 即刻走去沖返個涼先～～～發夢以為好返。

夜晚係爸爸落力游說之下， 啪左粒退燒葯，好在奶媽儲奶足夠， 唔担心阿囡無人奶食， 至多泵出黎個D比阿仔洗臉用。食左粒退燒葯， 點知都係逃不過病魔， 成晚發冷， 冷到騰騰震。冚左兩張被都係咁起雞皮係咁震， 點算好？奶媽個腦只係想快D好返因為仲要照顧對仔女架。

最後要著哂長袖衫褲加兩張被至瞓到， 不過半夜又熱醒， 真係忽冷忽熱。翌日， 個頭仲係好痛， 連胃口都無埋，呢個頭痛跟足奶媽48小時。

諗諗下可能半夜起身餵奶時， 經一經過冷氣位， 吹親加埋成個月好攰好攰， 特別易病， 所以呢次就忽然發燒掛。希望唔好影响以後既身體抵抗力啦， 因為岩岩至坐完月， 始終都有少少担心。

唔知係咪阿囡知奶媽唔舒服， 呢兩日居然無半夜醒要食奶， 阿囡你係咪真係咁乖呢？ 如果自始戒夜奶就好囉。