TRAINING 6﹣7天， 健康院覆診

1 Mth Day 12 呢日要去健康院覆診見醫生， 因為撞正哥哥瞓晏覺時間， 媽媽唯有一個人去健康院。嘩， 媽媽覺得自己好叻呀， 因為兩年以來未試過單拖帶哥哥去覆診架， 因為媽媽好驚除衫換片個下， 尤其係兩個月以下要剝光豬再掟去磅重， 呢下真係好RISKY架嘛， 一陣成手都係屎屎咪屎火， 縮手又唔係唔縮手又DIRTY。不過做左兩年阿媽， 又唔想麻煩人， 呢次好熟手咁自己去， 求人不如求己。你睇媽媽揹住阿妹背後又BACKPACK。

點解唔推車仔呢？ 因為天文台預測呢日下午稍後時間會下雨， 乜為之稍後呢， 無人知， 唯有揹住， 最方便架啦， 唔係阿媽担得遮黎推唔到車仔仲衰。

 Claire: 媽媽， 我都覺得你好叻女呀。

呢日係TRAINING 第六日， 好明顯個TRAINING 係失敗， 因為全日阿囡好似食左安眠葯咁， 由朝瞓到晚， 唔知點解咁好瞓喎。

雖然瞓左一整日， 但夜晚都係繼續瞓喎， 媽媽成日同爸爸講， 好似比人塞左安眠葯咁， 食奶都唔醒， 唔知做乜。

呢日呢， 又回復返夜奶了， 清晨五點八起身食奶， 囡呀囡， 你快 D 六點八至食奶啦， 否則媽媽返工後， 可能真係頂唔順要餵你奶粉了。

1 Mth Day 13 呢日又要返健康院囉， 真係煩， 政府D野硬係要分幾日做。呢日要去做聽力測試同見姑娘。所謂既聽力測試流到爆， 一分鐘都唔駛就搞掂， 勁。

呢日全日下雨， 阿媽揹住阿囡再揹埋BACKPACK再担埋遮， 嘩， 真係覺得自己好叻囉。臨走仲行多五分鐘去買TEA 返歸比阿仔食。

呢日係TRAINING 第七日， 又係失敗既， 全日阿囡係昏睡左， 好似食左安眠葯咁。唔知做乜。全日醒既時間只有一個鐘頭咁大把。

Isaac: 媽媽， 我餵左妹妹飲安眠葯吖嘛

Isaac: 妹妹， 食葯啦， 食左你瞓得好D咁媽媽咪多D時間陪我玩囉

Claire: 你唔好玩到咁癲係度大叫我咪唔會醒囉。

呢日媽媽發現， 原來阿囡好鐘意跟人講野架， 不過得個口形。當媽媽近距離同妹妹講野時， 妹妹會比反應， 就係跟住擘下擘下個口仔， 想講野但又未識講喎。

TRAINING 第七天，妹妹又係昏睡左， 又係好似唔識肚餓咁。呢朝阿妹清晨五點起身， 做乜阿妹你好似返番頭一個月咁架， 一朝比一朝早起食奶。

43日既妹妹， 體重係8磅13安士。比起出世重左2磅12安士。不過媽媽好貪心， 想妹妹去到十磅， 可惜爭磅幾。唔知到兩個月， 阿妹會幾多磅呢？