滿月了

Day 30 呢日開始阿惡女又發作， 好難頂呀， 難為阿媽由朝對你對到晚。點惡法？ 又係硬頸到要人抱至收聲， 話之自己喊到斷氣死左為止。奶媽安靜既日子原來只係三日咁大把。

不過安慰既係， 奶媽呢日見到阿囡伸懶腰， 嘩， 乜個面變得咁脹爆架， 哈哈哈， 真係呃得下人。

呢晚奶媽有個煩惱， 就係揾唔到位攝奶了， 奶倉爆到瀉， 任奶媽點執都好， 都偷唔到條隙縫出黎放新奶。

奶媽諗緊好無停止再邊餵邊泵既方式， 直至返工個日至再黎。因為呢度既奶， 應該夠阿囡兩週食量有多。

1 May 11 呢日滿月啦， 本來媽媽一直好期待呢日放囚。可以出街街抖下氣， 咁岩又係幾日連續公眾假期喎。可惜呢， 爸爸個心只係掛住同阿仔去邊度食早餐啦， 去唔去同阿仔睇戲好啦， 同阿仔去邊度買玩具好啦， 一輪咀PLAN左幾日紅日節目， 但都無預媽媽囉。呢D仲唔係要仔唔要母咩。真係乜心機都無。

出世時同一個餅印出既兩兄妹， 究竟滿月個日， 個樣有幾唔同呢？

Claire: 梗係唔同啦， 我滿月都堅持唔比奶咀呃左我去瞓既， 我做人最緊要講原則， 媽媽陀住我時，我堅持KEEP FIT 唔吸收。出左世堅持瞓覺唔食奶，醒左堅持喊到自已斷氣都要迫你抱起我。我叻D

Isaac: Hello, 我係兩年前既Isaac呀。我好聽話架， 雖然都成日要人抱， 但我勝在食奶咀， 一食就自己瞓到。湊我輕鬆好多。