伴

Isaac 出街好斯文架, 不過係屋企就無時停. 好似呢日周六咁, 無人陪佢玩, 佢就係網床扮跌玩一餐. 媽媽望見都驚佢跌落床個下, 會扭親條頸

Isaac:嘩, 我跌啦

Isaac: 再黎多次先

呢個pose係跌完之後再賴下張床. 就係咁不停咁跌跌跌, 卒之比爸爸鬧

媽媽成日都話要比阿仔學音樂, 點解, 因為佢真係由朝到晚玩住樂器同跳舞架. 之前post 過video, 家下又有相為証

媽媽個時放產假, 就一邊餵妹妹飲奶一邊同 Isaac 唱歌跳舞. 阿仔好開心架, 當然媽媽都好享受呢個moment

 呢張相係佢拍緊手打緊節拍跳舞.

可惜而家返工, 不過等媽媽七月中做全職後, 又可以同 Isaac 由朝唱到晚了. 呵呵呵.

Isaac 好照顧妹妹架, 成日都要走去摸妹妹, 成日都搶住要抱妹妹. 呢朝媽媽就比妹妹陪佢賴下床仔.

兩兄妹好難得一齊望鏡頭, 唔知做乜囉, 兩兄妹咁齊心, 一人搭一隻手落對方身上.  

影完一張, 阿仔即望住妹妹, 個頭都無再望返相機. 激死.

妹妹就掛住望媽媽.   Claire: 望相機影相啦哥哥, 你隻手唔好咁大力壓住我個肚呀

除左妹妹, Isaac 仲好鐘意貓貓, 視如寶咁. 出街都會自己拎住係手.

 有次係電梯係咁摷妹妹bb車下既袋, 媽媽唔知佢做乜啦, 見到佢摷得好辛苦. 哦....最後有隻叮噹係個車底袋到拎左出黎. 真係唔知佢幾時放左落架車到囉

跟住同齡朋友呢, Isaac 最鐘意就係話去揾博博. 一個星期講幾次. 可惜由細識到大既博博呢, 由細到大都好怕羞, 唔肯比 Isaac 拖住佢玩~~~~直到呢個月一齊返學校既playgroup, 博博至打開佢心窗, 比 Isaac 拖住手仔咋. 媽媽見到好開心, 因為仔仔終於無比人請食檸檬了.

兩小朋友第時唔知會唔會變老死呢, 真係出世第一日已經識既朋友仔, 仲要係鄰居仔仲要係同學仔, 八月開學之後仲會日日見住, 唔知佢兩個會發展成點呢?

仔仔乜樂器都鐘意玩, 可能係媽媽陀住佢時, 鑼咁大個肚都仲唱緊詩班夜晚又要聽住歌至可以入睡, 所以仔仔出世後, 寧舍鐘意音樂. 每次返到教會, 都好主動拖住媽媽去彈琴, 你睇佢笑得幾天真瀾漫 

之前身痕去問左屋企附近既琴行, 老師睇過仔仔對手, 話適合學琴, 可惜兩歲呢個年紀呢, 無乜班可以開到, 唯有等下囉.

 最近媽媽上網search下啦, 見好多forum d 人都狂鬧兩歲連 abc都唔識點學琴呀~~~~唔知呢 d 人係咪父母呢, 而家好多人兩歲都識哂 a- z 架啦. 咁用佢地理論, 阿仔咪可以學琴囉

不過媽媽都唔會比壓力阿仔, 學乜都好, 旨在係比仔仔發揮佢興趣姐, 總好過係屋企不停彈結他, 媽媽又唔識教佢彈, 但又要一邊彈住一邊迫媽媽唱歌喎, 真係一個彈一個唱, 可惜佢又唔係彈緊首歌既譜. 如果唔背熟首歌既音, 真係好難跟住唱.