預演全職媽媽生活之揾節目

1 July 11 好耐無同ISAAC去圖書館了， 趁呢日假期， 媽媽決定晨早餵完妹妹食奶奶後， 一個人帶阿仔出街街。留返爸爸同妹妹係屋企一齊大昏睡。晨咁早仲落住毛毛雨， 無損我地去圖書館感受下書卷氣息。

Isaac: 媽媽， 去圖書館可唔可以帶埋叮噹入去架

同之前一樣， 入到去， 摸完書就係跑去個閱讀台到。我地咁早入到去， 幾乎張張枱都吉既， 阿仔徧唔正經坐， 卻係跑上台到坐。好在媽媽有哂經驗， 呢日係著褲同佢去圖書館， 至可以一齊坐。

不過仲係好細既仔仔， 唔似得人地咁靜靜地睇書， 無論媽媽拎邊本書都好， 最吸引ISAAC眼目既， 都係周邊既小朋友。所以媽媽好快決定執幾本故仔書借返屋企算。因為我地仲要去睇醫生。

成臉爛哂， 重災區依然係個咀。醫生話係濕疹喎， 天氣一變就係咁。可能呢個星期， 婆婆工人都無開冷氣， 有兩日媽媽放工返到去， 仔仔成身熱到痴淋淋， 唔知係咪咁， 搞到皮膚惡化。

近鏡可以睇到塊臉係出哂粒粒。ISAAC 呢幾日係咁嗌好痛， 可能呢 D 粒粒真係痛啦， 因為媽媽無出過， 唔知係咪痛了。

除左去圖書館借書外， 媽媽仲培育仔仔成為一個有文化修養既小朋友， 因為我地仲入左大會堂睇下有乜音樂節目可以睇。咁岩比媽媽見到HARRY哥哥 SUMMER 有互動表演喎， 點知買飛時， 話全港已經FULL HOUSE。唉， 下次真係要密密留意大會堂既POST至得。不過咁， 對鐘意音樂既仔仔黎講， 吸引佢唔係HARRY哥哥互動表演， 而係一張又一張既樂器演奏會既POSTER。所以媽媽都買左兩張演奏會飛。。。。。原來仔仔兩歲都要門票入場架。所以唯有買兩張。好在呢個演奏會都唔係好貴姐。

黎緊既全職生涯， 媽媽相信都好多日子會同仔仔踎大會堂睇下呢 D 懶係有文化修養既節目。所以呢朝只係比準全職媽媽黎一個熱身， 兩周後做全職， 就會一個人成日同仔仔睇呢D節目了。都唔知係仔仔陪媽媽揾節目吖， 定媽媽幫阿仔揾節目了。

不過做全職奶媽真唔易， 媽媽已經好早出門， 但都要睇時間做人， 搞到圖書館啦， 大會堂啦同睇醫生呢幾個環節， 都好趕頭趕命。因為媽媽仲要返歸餵妹妹食奶， 免得要爸爸操勞餵奶樽嘛。趕頭趕命跟住仲要揹住袋書， 真係好耐無揹過咁重既袋了。不過呢D 日子應該黎緊大把媽媽嘆。