南丫島一天遊

20 Jan 13 呢日舉家旅行, 目的地係南丫島. 因為爸爸見兩兄妹行大棠行得咁興起咁HAPPY, 所以話去南丫島.

可惜, 未上船, 阿妹已經比爸爸CLICK 跌左, 塊面珠擦損左. 陰公, 到而家仲有撻LA呀.

Claire: 我喊完, 食返粒燒賣就無事, 唔駛怕.


船上係咁食, 反而哥哥乜都唔食, 專心睇風景. 落左船, 我地出發行山LU. 爸爸話搭去索罟灣落船, 行一個鐘山路, 係榕樹灣返歸.
Claire: 未出發行山, 幫我影張相先吖


Claire又係好努力咁靠自己雙腳行路. 不過其實都幾多太斜既路, 免得Claire不知就裡, 唔識就力碌落山, 所以, 一到大斜, 媽媽爸爸就會夾硬抱起佢黎行.



索罟灣往榕樹灣方向行無耐, 會見到成個海灣, 梗係要兩父女影張合照啦. 不過Claire 扁哂咀咁, 好唔情願比人抱喎.

幾經辛苦, 終於經過涼亭, 又係小朋友開餐時間. 呢日無媽媽愛心旦糕, 只有爸爸愛心一早買定的面包. 就係兩兄妹既午餐黎.

嘩, 一個鐘既行程, 由兩兄妹行, 我地接近行左兩個鐘, 至到呢個洪聖爺沙灘. 冬天落沙灘玩, 真係未試過.  

Claire 係咁用手撥沙又拎上黎. 搞到成身沙.

Claire: 我撥, 我撥.....

捱肚餓, 成兩點半, 我地至坐低食所謂既lunch. 其實係tea 囉. 特登揾左間B.B., 評價好似高咁. 原來真係好好味架. 哥哥最ENJOY 係睇風景, 望住船船食野.

Claire: 媽咪, 我好肚餓呀, 食住件衫先得唔得呀

我地點左三個TEA, 哥哥話食包, 所以比佢叫蝦三文治, 媽媽食焗薯, 因為諗住哥哥食唔哂份三文治, 媽媽幫食埋. 所以唔叫咁貴了. 求其就算. 點知就係呢三件焗薯出事, 食完喉嚨痛, 回程已經作病, 返到屋企痛到呢~~~~卒之又要睇醫生.


爸爸叫左呢碟蠔意粉, 爸爸話148元喎. 嘩, 好貴呀~~~對於無野做的媽媽來說. 不過, 蠔真係好好好好大隻, 仲好好味TIM. 仲有意粉係好有TEXTURE. 以佢既質素, 呢個價錢係值既. 因為淨計大隻蠔, 都有六隻咁多.

係涼亭食左半個迷你包仔既Claire, 呢下真係好肚餓. 指定要食爸爸碟意枌, 仲係咁食.

Claire: 幫我再筆吖唔該, 我未夠飽呀

食完呢餐, 我地特登折返SHELLY個度買旦糕, 係TAKE AWAY, 點知搭完船返中環時, 件CAKE都溶左, 激死. 仲話可以KEEP 兩個鐘.

一上船, Claire 自己除哂鞋襪, 真係失禮. 佢出街坐凳, 除非係baby chair, 否則佢指定動作幾乎自己除哂鞋襪. 媽媽都唔明點解. 每次問佢, Claire話自己熱熱喎. 赤腳講電話, 似唔似內地人呀~~~失禮死人呀阿妹你

 

 

 

 

老師眼中的好學生

18 Jan 13 呢日放學, Isaac 好興奮咁展示比媽媽睇, 呢盒小禮物. Isaac 話係因為佢儲到五張乖乖貼紙至可以換. 聽閈佢仲係第一個同學仔換到. . 睇住Isaac好雀躍好興奮咁不停講, 就令媽媽諗起, 以前細個成日拎老師奬勵既禮物個種心情. 所以媽媽特別了解Isaac 呢種興奮同雀悅.


後黎, 家長日, 班主任力讚Isaac好乘, 行為仲好似大哥哥咁, 鐘意保護同學仔. 呢個性格, 好似係佢仲係歲幾時, 已經發展左架啦, 當時仲未有妹妹, 但一同其它小朋友一齊玩, Isaac就鐘意扮大佬咁款, 保護朋友.

出乎意料之外, Isaac 係班上成績頭五名, 老師話有表現優異奬. 嘩, 媽媽好開心呀. 不過跟住即刻諗, 唔通選錯學校? 莫非以佢能力, 真係可以入讀程度深既幼稚園? 不過諗下諗下, 人生咁長路, 等佢有個開心童年玩下仲好, 以後讀書機會仲有廿幾年呀~~~~

希望Isaac 呢個好學生表現可以繼續keep 落去啦.

即興節目

14 Jan 13 呢日本來無節目, 忽然收到朋友打黎話見下媽咪, 媽咪梗係昆呢個姐姐出黎幫對仔女影下相啦, 哇哈哈. 可惜晏D哥哥又要返普通話, 所以, 唯有屈就少少, 係學普通話隔離個遊樂場玩.

有哥哥愛錫的Claire, 真係幸福.


Claire: 哎呀, 唔好攬到我咁實啦, 我抖唔到氣架.

Claire: 我都好錫哥哥架, 佢一喊我就撲埋去呵佢架

Claire: 除左哥哥愛錫我, 媽咪都好錫我架.

 

Claire: 不過媽咪成日迫我做高難度動作. 我好細胆架

Claire: 我淨係鐘意唔駛自己郁, 媽咪抱我飛架咋

Claire: 有圖為証, 媽咪幾錫我, 我又好冧媽咪架. 嗲死人呀

呢日, 妹妹無瞓晏覺, 真係攰到呢, 最後只係街恰左半個鐘都無, 就起身了. 真係同其它BB差好遠. 最後要多謝呢位空姐朋友, 咁遠搭車又咁悶地陪我地大半日, 仲要做埋攝影師TIM. 真係唔話得.

椰皇燉鮮奶

有一日， 忽然諗起椰皇燉鮮奶。CHECK下點整啦， 咦， 原來好易架咋喎。問下工人識唔識買椰皇， 原來， 又靚又甜既椰皇， 搖佢係無聲既。因為裡邊既椰水多；相反， 如果搖佢有聲， 即係老椰皇黎。唔甜。明了， 又識多一樣師奶野。

開椰皇咁高難度既野， 我都係請槍工人算。開好椰皇， 倒起椰水。跟住我會好隨意咁用一半椰水， 溝相同份量既鮮奶， 加兩隻旦白， 打勻佢。我見好多網上食譜都話要加醋， 不過可惜屋企無醋， 而且我諗唔明醋既作用係乜？ 唔通係要令椰水更出？ 算啦， 屋企無醋， 亦都唔想特登為個椰皇燉奶去買一支然後用幾滴。所以， 整左兩次既椰皇燉奶， 一滴醋都無落， 結果係， 都造到同一效果。
 煮野一向好隨意隨心， 所以份量無用量杯去量幾多安士奶同水， 不過每次都用兩隻旦白。再加好隨意既糖調下味等佢甜下就算。用大火燉佢35分鐘， 食得。不過整左兩次， D椰肉都係落左仔仔個肚到， 媽媽無得食， 嗚嗚～～～

忌廉飯

又係要善用資源既時間。做完木糠木布甸淨返既材料實在唔知點處理。整完雪糕仲有少少忌廉。好， 仔仔咁鐘意食忌廉， 就整個忌廉飯比佢食先。

不過呢次倒出黎， 相比之下， 好似忌廉仲多過飯， 下次可以減少忌廉份量了。不過呢鋪係哂冷， 用哂所以忌廉為目的， 所以算啦。

原來忌廉汁又係好易煮架咋， 我用左材料係一比一既忌廉同牛奶。加埋一隻旦黃。忌廉我用左約250ML， 牛奶都係咁上下， 加埋旦黃。發勻後， 跟住落鑊煮。煮到變杰身， 就係忌廉汁了。不過用剩既忌廉原來唔少， 所以， 煮到杰身都好多汁， 唯有索性放埋飯入去一齊煮， 幫手索下汁。

上網睇， 忌廉汁唔好用大火煮。不過我用大火煮， 都無乜點燶。因為細火煮呢， 煮好耐都未到我要既TEXTURE。其實最緊要睇火就真。大火煮到咁上下， 可以收返中火架嘛。

完成了， 仔女食得好開心。因為仔仔鐘意食忌廉。不過味道呢， 我覺得同一百蚊一碟既忌廉意粉既味道， 爭好遠。阿Q咁諗， 又係既， 如果我煮到一百蚊一碟既忌廉意粉味道， 我可以去酒店做LU， 呵呵呵

自製雪糕

之前整木糠布甸， 淨返半合忌廉， 趁未過期， 即刻用埋佢。呢次係整雪糕。原來雪糕好易整架咋， 唔駛買雪糕機都得。

呢次全程無用電動打旦器，下次試下用， 睇下分別係邊先。

唔用打旦器， 改為人手搗爛。其實都幾吃力， 因為前後攪左四次。每次都比之前一次更用力。

呢次係用剩餘既物資整， 所以整雲呢拿雪糕。

我用左既材料係： 250ML 忌廉， 好似六湯匙煉奶， 110ML左右既牛奶， 同三茶匙既雲呢拿油。呢次既煉奶同雲呢拿油係加碼咁落， 因為雪凍左， 味道會變淡， 我怕雪糕唔甜， 所以落多左。最緊要係試左味， 至收手。因為一雪左， 就無得再調味了。

忌廉要先打發至企身。跟手倒哂其它材料一齊伴勻。其實好驚囉， 因為把牛奶倒落忌廉到， 本來企身既忌廉好似溶左咁。不過唔理LU， 伴勻左之後， 放入膠合入冰箱。雪佢45分鐘左右， 拎出黎用人手搗爛哂佢， 摷勻哂成合雪糕。呢個動作， 係要令空氣入左雪糕入邊， 令雪糕滑D， 同埋減少冰粒形成。呢個動作， 要重覆做三次， 直至糊漿變成雪糕為止。
人手搗爛既雪漿， 幾唔靚

不過當變成雪糕時， 又OK喎， 仲幾滑。不過好似甜左少少。下次可以落少一湯匙煉奶。

大棠賞紅葉

13 Jan 13 呢日, 爸爸瞓醒忽然話去街, 明明之前又話唔去喎. 好在媽媽早一日做左功課. 知道大棠有紅葉睇, 又近. 所以爸爸忽然話去街, 媽媽都有IDEA 姐

Claire: 我夠唔夠型呀? 似唔似去睇紅葉FEEL?



嘩, 毫無準備之下, 忽然去睇紅葉, 原來好辛苦架. 適逄呢日熱到暈咁滯. 仲要媽媽係無帶水, 真係渴死. 之前做功課, 話係元朗站打的, 去到大棠燒烤公園落車, 行半個鐘就到. 不過以Claire 腳仔, 我地都行左應該有45分鐘至到紅葉地方.

 Claire: 紅葉有乜好睇呀? 我行到好肚餓呀

嘩, 咁大棵紅葉, 媽媽真係响香港無印象見過.

Claire: 乖啦, 影埋呢張, 比你食野喇.

因為爸爸打比媽媽話出街時, 媽媽同兩兄妹一早出左教會. 毫無準備, 好在之前個日, 媽媽整左愛心旦糕仔. 所以, 順便叫爸爸係屋企執定幾個比小朋友醫肚. 不過, 有人心急得滯, 變左咁樣. 咬唔到. 呵呵.

原本以為行30分鐘就可以影相走得. 點知, 我地行左三個鐘, 真係熱到呢~~~~不過, 兩兄妹好叻, Claire 由頭到尾堅持自己行. 可能係平時我地住城巿, 無乜見過咁綠既自然環境, 令到平時擅於嗲人抱既Claire, 呢日不停行行行.

Claire: 我邊行邊用對腳掃樹葉.

爸爸見兩兄妹行得咁開心, 興起話下次去南丫島喎~~~~

我地成四點至走, 去程打的時, 的士司機仲話回程唔駛CALL車, 因為大把人去, 實有的士坐~~~~~係呀, 大把人去呀, 條車龍塞到唔知去邊. 好在我地唔係渣車去咋, 否則都唔知去邊泊車好. 我地行到出大棠俱樂部個頭, 咁岩見有上山的士裡的客人唔耐煩(因為勁塞車)落車, 我地至有的士返出屯門咋. Claire 係架的士已經瞓到淋哂. 因為來回程都係佢自己行, 叻叻.

學人抺鼻

10 Jan 13 Claire 越來越老積, 正一老人精黎. 一日到黑學哂大人野. 呢兩個月, 仲鐘意拎張紙話有RUNNY NOSE 要抺, 一係話有污糟野要抺. 不過如果佢講得有RUNNY NOSE, 十成十就係真既. 好叻女架. 要係識講, 要人幫佢抺. 唔會索返入鼻.

Claire: 我個鼻真係有野係裡邊呀



Claire: 拿, 你睇下, 我抺左出黎架

Claire: 我再撩下先

Claire: 人地做緊正經野, 你唔好影啦

睇下阿妹個眼神幾仇視媽媽~~~~~
而家每晚臨瞓, Claire 都話有污糟, 老點媽媽拎紙巾比佢抺. 有次仲試過自己抺抺下瞓著左. 其實媽媽覺得佢玩多過真係抺污糟野囉

我夠唔夠老積

10 Jan 13 Claire: 我最鐘意學哥哥， 我又唔會執輸。見媽媽迫哥哥用筷子， 我梗係要學埋一份。 呢晚， 係Claire 第一次執住對筷子食飯。當然都係到目前為止， 最後一次啦。貪玩而已。以妹妹對手既SIZE， 媽媽暫時未打算TRAIN UP 妹妹用筷子呀

Claire: 做乜影我相～～～

Claire: 食飯呀～～～～唔好影


人仔細細， 老老積積。最鐘意係點人食野， 就係當佢食緊野， 見你停左手， 佢會指住你， 同你講： 食野
見到哥哥玩， 又會指住哥哥講： 食野， 快D
十足個管家婆咁， 哈哈。不過呢方面， 又有點似媽媽童年喎。

親子木糠布甸．甘筍提子旦糕仔

其實呢周， 爸爸出差唔係屋企， 成日係電話問， 做乜佢唔係屋企， 至整咁多野食喎。所以， 呢日周五， 我地親子甜品就係Isaac 指定既木糠布甸。雪一晚， 咪岩岩爸爸返香港的日子， 可以一齊食囉。

第一次整木糠布甸， 原來最辛苦係要整碎馬利餅做碎。媽媽真係搗到有一刻， 想放地下踩碎就算， 慳水慳力。

整好碎， Isaac 工作係負責筆餅碎。
Isaac: 好好玩呀
第一次整木糠布甸， 媽媽都好緊張架， 因為驚忌廉會溶， 所以搏哂命催Isaac 要快要快～～～所以搞掂哂後， 成枱好似打完仗咁亂。成枱碎

Isaac: 好野， 我自己整左木糠布甸呀。

之前， 行經百佳見一袋甘筍五元， 嘩， 咁平， 梗係買左返屋企至諗。第一次用半條甘筍整肉醬芝士粉， 點知兩兄妹一齊撩返哂甘筍出黎。甘筍咁有益， 點可以唔食架， 又有乜方法可以令佢兩個食呢？ 吖， 不如拎黎整旦糕。

所以， 呢日拎左三條甘筍黎做甘筍提子旦糕仔。嘩， 兩兄妹，爭住食哂。Isaac 仲係咁問， 係乜野黎。媽媽梗係唔講， 一陣講左係甘筍， 容乜易你地唔食架， 哇哈哈。 Isaac: 等我筆落杯到先。
Isaac: 媽媽， 我幫手筆呀
Isaac: 我叻唔叻呀， 筆到咁多杯。
嘩， 出爐既甘筍提子旦糕仔。媽媽用左甘筍汁黎代替少少牛奶架。因為費事嘥左D汁吖嘛