無落麥皮既蘋果金寶

又係好耐無整APPLE CRUMBLE， 呢日忽然上身， 想整黎食。可惜屋企好耐都無麥皮， 所以今次既APPLE CRUMBLE 係得粉同牛油加埋糖既姐。實驗証明， 都係加返麥皮效果會好好多。

我既份量係咁既：
餡係蘋果又係隨意， 因為大蘋果同細蘋果切出黎份量唔同。
玉桂粉又係隨意
砂糖又係隨意 （我次次都唔落， 怕肥）

我次次都係用紅蘋果做架咋， 懶得特登買青蘋果。用紅蘋果加檸檬汁， 其實酸酸味味都係返度。好過特登買青蘋果用唔哂， 要夾硬食。

蘋果同玉桂粉隨意係因為， 多蘋果整出黎咪食多杯， 少蘋果咪每杯少D 蘋果， 細細杯， 無乜所謂。有人話用牛油炒熟蘋果， 再加玉桂粉同砂糖調味到自己口味。我每次都唔用牛油， 乾炒到蘋果乾身收哂水， 再加玉桂粉， 咁就好香， 淨聞都好似M記蘋果批既味。炒蘋果時， 其實都係時候要開定個焗爐， 預200度咁燒住先。等到金寶搓完， 就差唔多入得爐焗。

鋪面既金寶， 我每次會用以下黎做準則～～～撈完按情況再加唔同材料的：
25G牛油
25G砂糖
50G低筋粉
麥皮一至兩湯匙
以上材料撈埋用手起勢咁撈勻， 再捽細牛油做細顆。咁就可以鋪面架啦。
呢次係無用麥皮既， 可能我技術有限， 之前次次用麥皮， 好快可以搓到成碗粉變哂顆粒。但呢次唔得。最後唯有再加25G牛油入去再搓， 肥死。但出黎效果都係唔靚。下次真係要買返罐麥皮， 至再整金寶。

搓哂金寶放左係蘋果面後， 就可以入爐焗40分鐘。拎出黎就食得。快靚正。係我喜愛既甜品之一黎。以後慳返幾十蚊， 自己係屋企整好過。