薑汁撞奶．蘋果糖水．芝麻醬

好耐無整薑汁撞奶LU， 呢晚忽然興起條筋， 想整番碗黎食。不過怕肥， 所以係整無加糖的甜品。材料份量係隨意～～～哈哈， 好求其。其實咁講， 按食譜係220ML奶加一湯匙薑汁。不過我真係好隨意， 好似工人食得辣， 咪落多幾匙薑汁。工人鐘意甜， 又落多D糖。好似煮餸咁。調味因人而異。

薑汁撞奶好易整架咋， 磨左適量薑汁出黎放係碗先。跟住煲奶， 不過睇好多前人經驗話， 唔好煲到滾。只要邊邊出煙同開始起泡， 咁就OK架啦。即刻熄火， 跟住好似玩野咁， 倒落另一個煲到， 咁為之一次。然後再倒返落頭先煲奶個煲到。咁為第二次。我次次整薑汁撞奶，都係用呢個方法。來回一共撞佢十次， 跟住起手倒落放左薑汁既碗到。如果要加糖， 我係一熄火就加糖， 跟手即倒落碗。之後就唔再郁個碗， 等佢兩三分鐘， 咁就有一碗自製薑汁撞奶了， 係咪好簡單呢

薑有老薑有嫩薑， 所以一湯匙薑汁， 有時整出黎未必夠味。真係睇薑而定薑汁份量比較好。


除左薑汁撞奶， 之前其實仲按仔仔要求， 煲蘋果糖水，好潤又唔會太甜（唔放糖）。好過出去比三四十蚊食一碗所謂滋潤既圓肉糖水。個次煲既蘋果糖水， 只係放圓肉， 杞子， 蜜棗同埋蓮子， 當然唔少得主角蘋果啦（仔仔提左我好幾日要煲蘋果糖水， 咁呢味糖水點可以少左蘋果姐）鐘意食甜既， 差唔多煲好可以放冰糖。我特登批到蘋果肉好薄， 全部料一齊煲佢兩個鐘， 乜味都出哂黎。真係甜到岩岩好， 岩哂小朋友冬天食。可惜無影相。材料份量又係個句：全部隨意， 嘻嘻， 按個人喜好同經驗而放就得架啦， 鐘意多渣咪落多D 蘋果同圓肉囉。係咪

好， 跟住呢晚， 第一次整果醬。好緊張架， 唔知整唔整到吖嘛。仲要懶叻咁， 一野就買芝麻粒， 自已洗自已炒自已磨～～～～卒之勁後悔囉。下次我會買芝麻粉算。返到屋企就可以開爐整醬， 慳返唔駛炒唔駛洗又唔駛磨。咪睇芝麻咁細粒， 原來磨哂變粉， 要好耐架。所以我無耐性， 磨磨下， 索性未變哂粉都照用黎做醬， 當有口感算。哈。

芝麻醬既份量係：糖既份量係芝麻份量既一半就OK架啦。例如100G芝麻粉， 我就落50G糖～～～～其實食左兩日， 我都覺得好甜囉， 相信糖既份量， 下次可以再減。因為自磨芝麻粒關係， 我仲加左少少白芝麻落去一齊磨， 因為白芝麻易出油， 有助我整果醬嘛。磨哂變芝麻粉（磨之前要炒香芝麻至得架）， 我至開始計份量， 量左出黎原來加埋白芝麻粉有成120G， 咁我就落60G糖。糖係用黎做糖漿既， 放入煲， 加一湯匙水一齊煮， 煮到變成糖漿。好驚會煮燶架， 咁少水。所以起勢咁攪， 又開細火黎煮。煮到滾後， 就熄火， 慢慢落芝麻粉， 一路落一路起勢咁搞。搞勻哂再開細火煮佢。煮到有香味， 就搞掂。
係咪好易就KO左一樽芝麻醬出黎呢。好杰架， 真材實料， 無化學成份。果醬煮完黎要倒扣個樽， 原來係有助真空架喎。仲有， 入果醬之前， 要開煲水煲一煲個果醬樽同蓋先， 有助消毒， 咁就可以延長果醬存放既時間。120芝麻粉， 做出黎原來得咁少芝麻醬架咋， 唔知食到一個星期得唔得呢。不過食唔哂都要掉， 因為無化學成份， 好易變壞。上網睇返可以KEEP兩週， 但有小朋友， 一週就唔敢再比佢食了。