首爾 SHOPPING。玩雪之旅 2016。DAY 2 南大門SHOPPING。本粥。神仙雪濃湯

12 Feb 16 一覺瞓醒，精神哂。住明洞有個好處，就係宵夜實有得買，早餐一落樓又大把選擇。唔似之前住SEOUL STATION咁，百無。

呢朝我地選左本粥 본죽 ，係酒店行去，只需步速三分鐘就到達。幾咁方便。我地成九點幾先到⋯⋯嘩，條人龍呢⋯⋯

無錯，排到落樓梯位。真係好有心黎食先會排囉。

時間關係，因為趕住去南大門掃街，我地排隊等個陣，已經諗定要叫邊幾樣。

呢個南瓜粥望落咁好味，梗係要叫比Claire 啦，佢指定架喎⋯⋯

爸爸開頭話叫四碗粥⋯⋯好在媽媽勸佢叫住兩碗先⋯⋯最後，爸爸都係話要叫三碗⋯⋯其實睇到呢碗，都好飽囉。

有個臭豬頭扭計。難得隔離個爸爸肯氹佢喎。

爸爸叫既鮑魚粥。最後，原來鮑魚粥係最好味，最香口架喎。不過媽媽真心唔識欣賞，哈哈。

還有一客海鮮粥。呢三大碗，足夠撐大我地四個人既肚皮。好飽地離開。當埋LUNCH都仲得呀。

Claire: D前菜好好味呀，媽咪。

之後，我地往南大門出發。由明洞去南大門，行路大約十多分鐘行到。去到南大門，我地就直接去MAMA兒童服個座BUILDING買野。出面明明望到幾層高，點知入到去，得一層。哈哈。ANYWAY，掃左唔少冬天厚衫，好厚有裡毛個種，都係六十至七十港紙咋，仲要係MADE IN KOREA，抵到爛。其實我地好忍手⋯⋯皆因有個貪靚妹，見到都話唔鐘意。比佢激死。

行左兩個鐘，又係時候要照顧同行既小朋友，唯有去食LUNCH。時間真係唔等人架⋯⋯咁就一個上午了。

LUNCH我地又返番去明洞（因為順道放戰利品吖嘛），係酒店附近食神仙雪濃湯신선설렁탕唔食都無事。一試不得了。仔仔大呼好味⋯⋯要ENCORE多一份兒童餐。

唔好以為清湯白飯。

內裡，其實收埋左幾塊薄過紙既牛肉架。真係好味既⋯⋯不過連吃兩個兒童餐⋯⋯就幾傷囉。

臨走個日，諗唔到食乜，仔仔又話要再黎食多次神仙雪濃湯。咁真係好好食好岩佢口味囉，咁多日，無乜邊樣佢要再ENCORE食多次既⋯⋯寫下寫下，搞到好想下次自己去韓國時，都食多轉TIM。