四日成長記

Day 13 晨早流流阿囡食完奶， 一副沈思樣。

媽媽：妹妹， 你諗緊乜呀？     Claire: 我諗緊哥哥幾時黎呵我吖嘛

阿仔開始習慣妹妹呢位新成員了。一起身， 就仆出黎揾妹妹。仲係咁呵佢TIM

每次揾妹妹， 都會係咁講：妹妹， 妹妹。可惜妹妹仲細， 未識應佢。不過好快妹妹可以同阿仔玩撲厘厘架啦， 到時阿仔實仲鐘意妹妹姐。

妹妹出院返家後， 媽媽已經見妹妹有脫皮現象，不過呢日咁岩餵奶時， 妹妹甩左手襪， 媽媽見到真係毛管都豎起， 好恐佈呀。

Day 14 有圖為証， 阿仔又係晨早起身頭都未梳就飛出黎揾妹妹。

咪睇阿妹平時好似好靜， 其實惡起上黎真係生人勿近。尤其係瞓緊覺你騷擾佢食奶呢， 真係咬住奶咀發哂茅架。媽媽次次都好怕有皮肉之傷。

呢日隻手仔仲係好得人驚囉

Day 15 呢日脫皮情況好左了。所以媽媽無再影低恐佈樣。

呢日妹妹好曳曳， 喊足六個幾鐘， 真係救哂命。

 Claire: 但我喊極都無人黎抱我， 我咪搏命繼續喊囉。

Isaac: 乜無姐， 我日日都抱你架。不過呢晚爸爸幫手揸機， 至有相為証。由你出世返黎個日， 我已經日日嗲媽媽比我抱你了。你睇我幾錫你。

Isaac 真係大個仔呀， 除左要抱妹妹， 仲學媽媽咁， 幫妹妹掃風，睇妹妹沖涼跟住仲想幫手倒左盆水去， 不過盆水實在太重， 我地唔敢比阿仔搞。

希望阿仔大個都繼續咁聽話啦。

Day 16 

朝朝食完早奶， 妹妹都會有一陣咁多既眼仔碌碌既時間。呢日望落好似精靈過之前幾日喎。唔通之前半夜食得飽飽？ 因為呢日半夜一共餵左兩次夜奶～～唔計OVER12點個轉， 計埋就阿媽一共起左三次身＠半夜三更。

為左全人奶， 媽媽會繼續堅持的。不過說實話真係唔知捱得幾耐，希望囡囡有朝一日快D戒夜奶啦。