一家貓頭鷹: 兩歲了

Isaac 話咁快就兩歲了。

今日既妹妹正正係阿仔兩年前既翻版，一舊軟飯咁。家下阿仔已經大個，仲有自己主見。

兩歲既 Isaac 係咁既：

著衫有主見，著乜色著邊件著乜鞋佢都要話事。媽媽唔會反對，因為NO HARM，咪由佢，等阿仔滿足感大D

鐘意貓貓, 無論係動物定公仔。呢輪出街要帶埋叮噹一齊出街街。但爸爸仲係唔心息，依然想改變阿仔口味鐘意THOMAS。問阿仔想帶乜，阿仔話貓貓, 爸爸就會話不如帶THOMAS吖。。。。阿仔當然暫時都係啋佢都傻。一係就睇電視，問阿仔睇乜，阿仔十次有八次話要睇伊哦（POOH 卡通片），但爸爸又係想改佢口味，不如睇THOMAS吖～～～～我估係爸爸中左THOMAS毒多D囉。要阿仔同其它仔一樣鐘意THOMAS。

鐘意跳舞，玩樂器同畫畫，好有藝術家氣質。不過唔知脾氣會唔會都變成藝術家咁臭。PLAYGROUP老師讚佢手部發展跳左STEP 所以畫出黎既圓係好精緻。可惜媽媽暫時未揾到屯門區有兩歲畫畫班，否則媽媽都會比佢去發揮所長。一日到黑係屋企開住MUSIC係咁拍拍跳跳，間屋係長期處於嘈吵狀態。

每次爸爸媽媽食飯，都要爬上黎裝下有乜好食。總之食野要跟大人一模一樣至覺得大個仔。

中左去街毒。無時無刻係街又好係屋企都好，都會UP：去街街，唔返屋企。至頂癮係話唔返屋企。坐月中既媽媽就會每次見佢出門口前同佢講，你要返屋企揾媽媽呀，媽媽同妹妹好掛住你。不過唔知咁講有無效，可以令佢係街度死心咁返屋企呢。

依然係好錫阿媽，見到媽媽唔開心，依然好似細個個時咁，即走黎KISS 媽媽，又呵呵媽媽。好孝順。

幫手做家務，要自己抹地，自己掉垃圾自己放野入雪櫃自己洗碗。仲幫手摺衫，而家妹妹出左世，妹妹換完片片仲幫手倒水。大個係咁就好囉，間屋肯定好乾淨，不過有對潔辟既父母，阿仔唔會污糟得去邊囉。因為佢爸爸對乾淨既要求好高架嘛，呵呵。

一日到黑不停講野，婆婆話佢係報寸，因為婆婆帶過佢去邊做過D乜，阿仔都會話返比媽媽知。媽媽希望KEEP住呢個習慣，咁佢以後返學都可以同媽媽講下學校生活。至少有事時都可以即刻了解到阿仔心態。

一日到黑做左反派，總之你要東佢要西。媽媽開始數10聲， 10聲過後媽媽唔會堅持，不過係一走了之唔啋你。呢招幾有用，未數到十，阿仔已經好聽話乜都肯。

係工人培訓之下，阿仔由以前好聽話食哂食餐飯，到今時今日要一路玩一路食仲要工人餵。媽媽放產假開始，已經唔淮工人再拎玩具呀書呀相機呀出黎陪阿仔開飯食。不過阿仔仲未習慣專心食飯，究竟阿仔你幾時可以變返以前咁，好快好專心咁食完一餐飯呢？

11 APR 11 晨早起身，爸爸已經送上生日禮物一份，就係阿仔最愛既貓貓手錶。