陳家開心果

13 Apr 13 呢日， 有隻HELLO KITTY同隻BEAR BEAR出走呀。


Claire: 我想帶佢地行街街咋。

Claire: 咦， 路經呢隻公仔， 幾特別喎。不如媽咪同我影張先吖

Claire 見我地買零食， 零食至係佢正餐。明明LUNCH食到唔願食， 但居然可以KO哂差唔多成舊砵仔糕。其實阿女你個胃係有幾大既姐？

Claire: 唔～～～我食到好飽呀。不過爸爸， 我幫你拎住袋紅豆餅先吖

落到沙灘玩， 唔知做乜玩到擘大口得個洞。

Claire: 媽咪， 你唔好影我啦， 你玩啦 。

呢副樣， 咁老積架。唔知Claire 諗緊乜。

Claire: 嘻嘻， 終於搏到你地輕撫我個頭讚我了。

爛玩的Claire, 明明都眼瞓架， 但去完沙灘， 見到遊樂場， 又撲過去玩。人仔細細， 所以大家都好緊張。睇下張相有幾多對腳係佢左近就知佢有幾多個人護住。



玩夠上山， 又有廿四孝爸爸抬佢上去。真係幸福。

所以， 當大家行到好攰時， Claire 上到山， 仲好有精神撩人玩。

Claire: Surprise~~~~

Claire: 咦， 咁都嚇你唔到？

Claire: 哈哈， 嚇到哥哥呀

Claire: 哇， 我再嚇你一次先

咪睇Claire 細細粒， 其實古惑到死。不過又好多表情， 最終係激到你大人唔嬲得佢落。成日氹到人地好開心。淨係睇佢表情， 都係陳家開心果黎。

自創香蕉腰果醬 （附食譜）

話說有次行開TASTE， 見香蕉忽然減價， 你知最近物價騰貴， 香蕉不知不覺已經加到四蚊一磅， 講緊可能去年今日仲係做緊三蚊或兩個幾一磅咋嘛。見佢減價， 阿仔又好鐘意食香蕉， 所以， 就買左一梳蕉返屋企。點知呢頭買蕉， 個頭阿仔又咳返。所以都係把心一橫， 煮左D蕉佢。

諗來諗去唔知煮乜好（唔想又整旦糕）， 不如， 就整香蕉果醬啦， 咁就可以比阿仔日日搽佢心愛的香蕉醬做早餐。

當睇緊點整香蕉醬時， 跟住又諗， 其實可唔可以加腰果既呢（因為屋企有合放左近一年既腰果未食哂）， 點知好似無人整香蕉腰果醬～～～～所以， 索性自已兩溝做實驗。自己日日做埋白老鼠， 其實真係好好味架， 好香香蕉味TIM， 正係我想要既效果(我係想香蕉味為主， 腰果做配角）

以下是本人的實驗食譜：

已焗腰果一杯
香蕉兩條
水近兩杯
檸檬汁 （一個份量， 備用， 但我次次都唔會倒哂落去， 因為人人口味不同， 我主張邊煮邊按自己口味調節）
砂糖  60G
燕菜精 一茶匙溝少少水

1）先分開兩次攪碎腰果(如果想腰果全部變漿， 可以一次過。不過我想食個時， 有少少口感， 所以， 我當時分兩次攪）。每次攪的時候， 需加少少水， 我兩次攪腰果， 共用去備用材料的水一杯（其實我發覺， 只倒半杯水， 去攪一杯腰果。煮出黎既果醬， 可以快點變杰， 唔駛煮咁耐）

2）把餘下的備用材料中的一杯水， 倒入煲， 再加入已攪好的腰果漿（如想果醬的腰果碎身一點， 可以留少許已攪碎的腰果碎不下， 留待果醬變杰時， 才下。 ）用大火煮滾。

3）快手切香蕉成片倒入煲中(我無預先切， 以免香蕉變色）

4）加入檸檬汁及砂糖一齊煮。

5） 邊煮邊攪， 滾後收細火繼續邊煮邊攪， 目的係要令呢煲果漿變杰變果醬

6）此時要開始試味了， 如不夠甜， 要加糖， 如太甜， 我會加返檸檬汁調和返。

7）大約煮 25分鐘， 其實會見到果醬開始杰身。如果仲未杰身， 可以加少少燕菜精， 好似果糖咁， 等香蕉腰果快點變醬。如果未到25分鐘， 煲果醬已經夠杰， 其實唔駛加燕菜精都得。我當時有加， 係因為攪碎腰果時， 一共落左一杯水， 煮左20分鐘都未夠杰， 至醒起加點燕菜精而已。

8）煮到杰身， 可以入樽倒扣了（同之前一樣， 煮果醬前， 玻璃樽連蓋， 要用大滾水滾佢十至十五分鐘作消毒 ）。倒扣左既樽， 今次我又試下入焗爐用低火焗佢十分鐘先。好似方便過用水， 感覺倒扣入水煲佢， 成日怕D水會入左個樽到）
 岩岩開火既腰果香蕉醬

一杯腰果兩杯水兩條蕉， 煮埋有咁多。煮個時， 覺得腰果味好強。但雪左之後， 香蕉味變強了。食落好有夏天FEEL呀。

後黎， 因為醬多， 我用埋黎做冷面醬， 一物二用， 嘻嘻。做冷面醬時， 用凍水溝返少少就算。都OK吖。

男仔頭

呢張相， 唔記得幾時影。不過真係笑死人。明明大好女仔， 卻比哥哥感染到， 學埋男仔野， 玩車車飛機不特止， 仲學埋哥哥做超人。真係比佢激死。

Claire: 我射射射 （衰妹真係講射架， 係咪暈低）


Claire: 我似唔似超人呀

媽媽頂唔順， 叫衰妹企定定影張相， 睇下， 明明大好女仔， 做乜走去學哥哥做超人姐。嘥哂。

上山下海＠長州

13 Apr 13 呢日爸爸休息， 我地見天氣幾好， Isaac 又鐘意坐船， 所以， 索性同佢去長州玩下。

大個仔自己買飛。其實係佢張八達通無哂錢， 所以至要買飛姐。

除左鐘意坐船， Isaac 仲好著迷所有交通公具架， 好似呢架街渡咁， 望到入哂神。

長州第一站， 係食。揾個地方食下飯先， 上網睇又好似好多好評， 但媽媽就覺得好好好麻麻。Isaac: 我帶左副超， 會唔會睇唔到野， D野食放左入鼻架？

 Isaac: 我好滿足呀， 可以飲好立克。

食飽飯， 起程去買話好味既日本紅豆餅， 咦， 係紅豆餅轉角位， 有間糕鋪好似好出名咁喎， 好， 全部人各買唔同口味試下先。其實如果呢舊唔係砵仔糕， 而係一舊飯， 唔知Isaac 仲食唔食得落呢。

呢間糕鋪， 媽媽覺得芝麻糕好食過深水埗間坤記。可惜佢出名既紅豆糕話未有喎。無緣一試佢招牌貨。

咁岩係紅豆餅個頭， 又有間BAR， 姨媽就買左串炸薯片。


爸爸除左買紅豆餅， 仲買左支手卷， 好多人食架喎。但爸媽都覺得有乜咁特別呢可？

長州講特別， 就真係魚旦了， 初時以為係發大， 點知咬落真係彈牙。不過買走返屋企煮都要五蚊粒， 太貴了。我地無買返屋企食， 只係响個度食左就算。

食飽飯又掃埋街，咁岩見到沙灘。Isaac 即話要去玩下， 睇佢話得幾開心。

Isaac: 媽媽， 你過黎一齊玩吖




Isaac: 哈哈， 拍到成手沙TIM

玩完沙灘， 姨媽話去行下小長城， 未上山時， 見到遊樂場， Isaac 又係玩到忘哂形。

之後， 幾經辛苦（其實條路唔辛苦， 不過好好好熱）， 我地終於上到小長城個涼亭了。真係熱到無人有， 但小朋友一點都無影響， 仲咁有精力係咁玩。

Isaac: Surprise!  Claire: 我見到你個樣都好SURPRISE呀

上完山下完海， 我地回歸返長州大街算。因為真係好熱， 唔想行。
去到巿集， Isaac 睇乜呢？ 睇到咁開心。

原來有人係度玩緊吹大波波， 引人去佢間店買野呀

 Isaac: 我食左個波， 咪唔駛買囉。

之後， 我地臨走， 再去食芒果糯米糍。 原來係無椰絲， 同埋即包架喎。

嘩， 好大隻芒果呀， 每件糯米糍有四分一個芒果咁多， 正。
麻麻地的綠茶芒果腸粉。


呢日長州之旅， 話咁快就走了。好似真係大澳好行D， 多野食多野睇D。不過哥哥未黎過長州， 叫做帶佢黎一趟。

自製牛油

之前整阿仔生日蛋糕時， 剩左好多忌廉同士多啤梨， 掙扎左好耐， 好無整多個士多啤梨MOUSSE CAKE， 但阿仔同阿女又未好返得哂喎。吊住吊住咁， 唉， 都係唔好揾自己黎搞 （做左咪自己要食哂）， 所以， 士多啤梨， 最後整左兩樽醬。而忌廉呢， 就做左忌廉意粉（例牌指定動作， 因為阿仔愛吃）。淨返少少忌廉， 唔知做乜好， 上網摷左好耐， 都唔知想做乜甜品又岩病病地既仔女食。最後， 比我揾到自製牛油喎。

仲要好簡單架咋， 用忌廉同水， 一比一份量， 打成就掂。VERY EASY

工具：
雪凍既食水一支
材料：
忌廉同凍食水份量係一比一， 即係有100ML忌廉， 就要加100ML水。
食鹽適量（按個人口味調節）

量下自己淨返幾多忌廉先， 原來得50ML。哈哈哈， 加返50ML 水。奉勸大家要整牛油， 必須做足安全措施， 因為水同忌廉一比一之後， 打起上黎， 真係火都黎埋， 就係彈到周圍都係。彈足全程。真係未試過咁彈。

呢張係開機無耐， 打到咁， 睇樣以為好杰， 其實唔係架， 一開返機， 就飛濺到四圍都係忌廉水。


打左我15分鐘之後， 開始有野睇了有白色一舊舊出現了。但唔好心急住， 一睇就知呢個唔係牛油樣啦。

呢個時候， 要再打， 但當再打時， 肉眼望到既水， 會更加彈。成件衫唔要得（因為我無用圍裙習慣）

打多成十分鐘， 終於油水分離了。牛油在望呀。

我貪心少少， 見到有牛油出現， 都唔停手， 繼續打多一陣咁多。牛油又好似真係又多返D喎。同埋會痴埋多少少， 無咁分離。

呢堆就係牛油了。用篩分隔左頭先打出黎既水同呢堆牛油後， 水可以唔要。呢堆牛油， 要用雪凍既食水， 徹底沖乾淨， 並確保打忌廉時出既油水， 已經倒哂， 無漬左係牛油上邊（所以凍水要不停油架）

用匙刮下， 沖下， 就變左呢PEI牛油。 隔哂所有水份後， 用手再輕輕擠出餘下水份。跟住按自己口味加鹽撈撈佢。

50ML忌廉製成的無加添牛油了。份量不多。半個手掌大。仲好， 唔怕食到變壞。以後， 整野食剩返的忌廉， 可以物盡其用了。

放電 ＠ 黃巴士PLAYHOUSE

12 Apr 13 學校生日會後， 我地就去PLAYHOUSE， 今次又去返荃灣麗城既PLAYHOUSE， 算係最近我地， 同埋佢係荃灣黎講， 最新淨的一間PLAYHOUSE。我地十二點去到， 無乜人， 有既都係麗城居民黎。

次次去PLAYHOUSE， 例牌動作係跳床放電


呢張唔係跌低左， 係Isaac 特登瞓係度彈床。真係得佢諗得出。

又黎一張超動感照。


Isaac: 我彈彈彈。
跳完彈床走去射槍

呢輪上腦動作： 做超人射人。真係比佢激死。

玩到身水身汗， 仲要不停咁搬野

原來係幫手砌間屋。

睇下Isaac 笑得幾有滿足感。

Isaac: 睇下我幾高， 頂天立地男子漢呀

話說呢條通道， 係好高難度， 又斜又跣。

 所以， 當Isaac SIR完， 跟住到妹妹爬落去時， Isaac 身為哥哥， 就係下邊等佢， 順便HUG HUG 妹妹， 真係一個好哥哥呀

 Isaac: 玩夠了， 等我出返去玩波波池先

 Isaac: 嘩， 等我落去游波波水先

 Isaac: 媽媽， 點解呢兩條滑梯咁好玩既

Isaac： 爸爸係我BB時， 教過我， 要瞓係波波到當游水架， 睇我幾咁梳乎

Isaac: D 水就黎浸過我個頭了。


呢間黃巴士PLAYHOUSE 雖然細， 不過幾好玩， 因為乾淨又新淨。乜設施都有， 如果再有團購優惠就更加好了。