自製藍莓果醬

因為生左個鐘意搽果醬既小朋友, 買多幾次果醬後, 諗下諗下, 都係自己動手做好. 唔係價錢問題, 而係出面買既, 都係加左好多化學野, 尤其係防腐劑. 真係食少D為妙. 但小朋友又鐘意食果醬喎. 咁唯有學整啦.

原來果醬好易整架咋. 仲易整過旦糕. 仲有, 口味按自己而定, 好過出去買.

每次我都會一次用哂兩盒藍莓. 即係話就話TOTAL 250G, 但我每次返屋企量, 就變左225G, 唔知係咪洗完又抺乾哂, 兩盒加埋無左25G水份呢.

因為阿仔鐘意有口感既果醬,所以, 我最近會留一半藍莓唔郁, 留返黎煮果醬時至用埋佢. 如果唔鐘意食到粒粒生果既果醬, 其實一開始可以用哂藍莓黎切.

首圥, 就係洗淨同印乾. 之後, 按個人口味, 留唔留起部份或一半黎調味了. 所謂既調味, 其實係用砂糖黎調. 決定好自己口味想點, 就把要調味既藍莓切開, 撈埋砂糖雪佢一晚. 兩盒藍莓 (乾哂水係225G), 我就會用60G砂糖撈佢. 其實自己都覺得甜架. 但街買好似仲甜喎. 而且砂糖可以延長果醬既變壞日子. 加上, 砂糖重手左唔怕, 翌日用檸檬汁煮時, 放返多少少檸檬汁調返咪得囉 (本人理論黎)
把切開左既藍莓撈砂糖攪下攪下. 攪攪下, 會見藍莓開始出水. 我會繼續攪佢 攪到D人越來越多, 砂糖好似混埋左入藍莓後, 就收手, 放入雪櫃等佢一晚.  煮野的得力助手.

好了, 雪左一晚, 係時候可以煮啦. 煮既時候, 我都係KEEP住用中火. 調左味既藍莓落煲前, 要用1/3個檸檬汁撈一撈佢. 至一齊煮.

煮煮下, 就會越來越杰, 好有果醬FEEL架啦. 不過煮個時, 要不停手咁搞, 否則會痴哂底同埋太杰, 好易會燶. 我通常煮到一滾, 我就會試味先. 呢個時候, 就係決定要唔要再加糖或檸檬汁既時候了(因為其它網址寫落 1/2個檸檬汁, 但我試過, 檸檬汁味強過藍莓味, 所以, 我都會榨定1/2個檸檬汁, 但唔會落哂, 落 1/3 個比較好)
每次整果醬, 我都會攬住阿仔一齊煮, 一來等佢有滿足感, 每朝搽佢自己煮既果醬; 二來個廚房都危險, 唔夾實佢, 怕佢一手推跌個煲. 我地每次一邊煮一邊試味, 係阿仔最鐘意既環節黎, 成日叫我, 比佢試下, 又再試下, 再試下, 就黎試哂成煲都未入到樽.

不停搞, 搞呢煲果醬大約20分鐘, 係時候再放埋之前留起既未切開原粒藍莓落去了. 放左落煲後, 我都會煮多佢一陣, 覺得原粒藍莓開始都少少淋時, 就熄火. 用最快既速度, 入哂樽. 前後加埋, 其實煮果醬, 大約用左 25 分鐘左右, 好快咋. 係咪快過整旦糕呢.

係果醬就黎煮好時, 我就開火煮一煲水, 作用係留黎倒扣消毒真空個樽 (其實都唔知有無真空到既, 因為擰開樽蓋又聽唔到有聲, 但做左呢個STEP, 叫做安心少少)

呢個STEP, 我就無乜耐性, 通常滾佢五至十分鐘就算. 因為入樽前, 我都滾個空樽連蓋十五分鐘至用的. 加上自製果醬, 兩周內食唔哂, 都會掉. 所以, 最後個真空倒扣STEP, 對我黎講都唔太重要.

兩盒藍莓整出黎既果醬唔係好多架咋. 得200ML左右架咋. 真係自用就差唔多. 不過得阿仔一個人食, 差唔多啦. 整得太多, 食唔哂又掉就好嘥.