自製士多啤梨果醬 （自行減糖）

整過藍莓果醬後， 阿仔成日話， 下次不如整士多啤梨果醬。講左好耐， 卒之見超巿韓國士多啤梨平， 買左兩合返去整士多啤梨果醬。

兩合細既士多啤梨夾埋， 原來只係重300G （洗淨抺乾去蒂後）。又係按個人喜好， 切細士多啤梨。我就特登唔切得太細， 因為阿仔鐘意食到有粒粒生果既果醬。

因為士多啤梨無果膠出黎架， 所以要加果膠， 不過， 見網上有人用印尼既啫喱粉做， 即係燕菜精。所以，我都係買燕菜精， 價錢平好多。同埋細細包， 岩唔係成日用既我。

好，把300G 既士多啤梨(已切）， 同60G既砂糖 （其實砂糖份量同整藍莓既一樣， 因為我覺得士多啤梨應該仲甜過藍莓， 無理由網上個個都落咁多糖， 所以自已減糖至60G）， 加埋1／3個檸檬汁一齊落鑊。撈埋1匙燕菜精。搞勻就開中火邊煮邊搞。

到滾時， 又係試味， 加唔加檸檬汁或糖， 就呢個時候再決定。

邊搞邊煮約廿分鐘， 其實都已經見到果醬開始成形。煮到杰撻撻時， 就熄火即入樽。

超多大粒果肉， 係按仔仔口味調較的。唔鐘意咁多果肉， 可以切細粒D士多啤梨至落鑊煮。

當然， 每次做果醬前，  一定要消毒空樽連蓋， 滾佢十至十五分鐘。

入果醬後， 倒扣個樽落鑊再滾多佢五至十分鐘， 作進一步消毒。

人唔多既話， 呢樽果醬， 可以食到一個星期了。無防腐劑又無加添劑。好過出去買。