佐敦谷公園放電

22 June 13 去完柴灣海防博物館， 見時間仲早， 仔女又未放哂電， 媽媽就建議去附近既公園玩。點知爸爸已經上左公路， 所以， 唯有去觀塘既佐敦谷公園， 都好大草地架。不過去到公園， 曬到死。仲要有蚊， 咬死媽媽。

難得一副慈母相， 玩到自已都癲咁。


牛高馬大仲係好鐘意坐呢D搖搖馬。

呢輪成日叫媽媽幫佢報打鼓班。不過佢性格真係好粗豪， 打鼓都岩佢既。

 Isaac: 嘻嘻， 我聽到你講野呀



 而家好少約同學仔出黎玩， 所以， Isaac 既玩伴就係佢最親既妹妹。希望佢兩個大左， 都咁相親相愛啦。

 除左公園可以放電， 仲有個大大草地比佢地任跑架， 正呀。睇下， 阿仔都唔知想做乜， 好似人地想瞓低咁。

原來係想起飛腳。呢輪都唔知佢係邊度學， 成日都飛腳。粗粗魯魯咁。

Isaac: 嘩， 我跑呀～～～～


比佢地放左半個鐘電， 我地走了。其實呢個公園， 可以玩好耐。住附近的人就好了， 有咁大個公園同草地。

海防博物館餵蚊遊

22 June 13 又係戶外日， 呢日撞正話雷暴喎， 不過媽媽見朝早都無乜雨， 預告話下午無雷暴架嘛， 所以， 我地照出車。本來爸爸想再戰大美督既。點知去到大美督， 就狂風雷暴。唯有折返去其它地方。出門前， 媽媽查到可以去下博物館， 其中一個係柴灣的海防博物館， 初初仲諗住走個時， 順道去埋鰂魚涌個消防博物館既， 點知， 我地DOU完大美督再落返柴灣海防博物館， 都下午一點幾了。所以， 呢日上本場， 我地只係去左海防一個姐。

門口就一大支炮顯得Isaac 幾咁眇小。

很久沒有和Isaac 來個合照了。相信越大， 就越小機會同佢影相。因為Isaac 麻麻地鐘意影相。

媽媽選擇黎呢度， 因為呢度多戰車， 岩哂Isaac仔。



睇到呆哂。

 巡視緊呢架戰車既設備。每次見到一架車， Isaac好好， 佢既好奇心會好快咁留意到邊個係座位， 邊度係呔盤，呢個洞用黎做乜．．．．．． 然後就會問我地。唔知呢種好奇心， 可以去到佢幾多歲呢？

 Isaac: 呢條魚雷黎咋喎， 都唔係車， 走囉。

如果唔係雷雨， 我諗呢度風景係好正。

黎呢度， 除左睇車睇風景， 仲可以學下環保。咁大個既太陽能發電器係度。

Isaac: 呢支隠形炮有咁大支呀

咦， 做乜跌左落去既呢？ 阿仔你唔通係度做緊運動？


時間不留人， 阿仔大個左好多了。背影幾咁高大。

睇完車， 仲有個歴史館講香港點比日本人打敗， 英國投降比日本人統治香港等等， 不過阿仔喊悶， 不停叫走。卒之走左去兒童閣個度， 原來有野扮下， 好野， 無咁悶了。

Isaac: 我去農務喇

Isaac: 我篩稻米呀

Isaac: 盤稻米拎唔到入屋架喎

Isaac: 妹妹， 涼唔涼呀？ 我幫你撥扇呀。 妹妹： 我好眼瞓呀

最後， 係兒童閣到畫埋畫， 我地就走了。

媽媽覺得好似未夠喉， 時間仲早， 所以就建議去公園再放下電， 媽媽就繼續餵蚊。呢日， 媽媽身上至少有廿粒蚊釘， 嗚嗚嗚～～～

反轉黃金

12 Jun 13 端午節家庭樂。爸爸話要出旺角遊車河， 出到去想買既鋪頭未開門， 唯有坐係隔離食下雪糕先。睇下Isaac 食得幾專心， 如果食飯係咁就好囉。


未經爸爸批淮的相， 不過好温馨呀， 唔POST唔得。充分表現左阿仔幾錫爸爸。

之後， 我地返番去屯門黃金食TEA BUFFET， Isaac 最鐘意就係食BUFFET。睇下， 一臉滿足既樣。仲食到成咀污糟。

Isaac: 等我留下倩影先。

上一次黎呢度食BUFFET， 好似係一年前了， 個時媽媽仲岩岩返新工。而家就無野做， 專心湊兩兄妹。時間過得真快。

大家食飽飽， 就去隔離玩遊樂場先。由細到大， Isaac都好鐘意快感， 就係推住個氹氹轉係咁快走快推。

大個仔了， 最近兩個月， 唔再怕爬呢個鐵架， 叻仔左好多呀。

Isaac: 我SIR 得好快呀

越大既Isaac, 越似媽媽， 睇佢玩呢個吊橋就知。以前都唔驚既， 而家一上去， 無啦啦坐係度跣過對邊。真係搞笑

 Isaac: 我呢D叫安全至上。

爸爸見Isaac 咁驚， 仲走黎嚇佢， 係上邊跳。兩父子咁又可以玩一餐。真係勁。

Isaac: 爸爸跳到我唔敢企起身。真係衰呀

雖然只係玩左一陣遊樂場， 不過Isaac 都好開心。事隔左兩周， 寫緊BLOG時， Isaac 仲記得去過呢度食BUFFET玩玩玩。小朋友唔單止記性好， 仲開始識表達了。

龍舟黃金日

12 June 13 端午節， 我地無去游龍舟水。不過去左沙灘隔離痴住龍舟水食TEA BUFFET。

出發前， 爸爸話去旺角一轉買碟喎。點知成家出動， 山長水遠去到未開門， 都一點囉喎。爸爸話等多陣， 咁不如去隔離食支雪糕先啦， 事關爸爸買左好多哈根帶斯既COUPON就黎到期， 屯門又無分店， 再唔食盞嘥。

一家四口兩支雪糕， 咁早無乜人， 大把位， 可以慢慢坐係度食。
Claire: 唔， 好味。

Claire: 爸爸， 你想唔想試下？

食完雪糕一點幾， DOU左幾個圈， 間鋪仲未開， 於是又打道回府去黃金海岸食TEA BUFFET

Claire: 嘩， 好肚餓呀， 要等到TEA BUFFET至有野食。我兩手一齊拎野食快趣D。

Claire: 吖～～～～


Claire: 媽媽拎左呢支朱古力泡芺比我當唇膏用

Claire: 睇我型唔型， 朱古力唇膏呀

Claire: 食野， 唔玩

Claire: 做乜又影我

食飽飽去玩玩。不過只可以玩一陣咁多， 因為哥哥要返學呀。自己上樓梯， 真係大個女了。

大個女開始自己玩滑梯， 媽媽都唔駛咁近保護佢。妹妹不經不覺大個女左好多。


睇下， SIR 得幾咁自在。好快， 又話要讀書了。

超級懶人法香蕉旦糕

前排超巿香蕉平， 買左幾隻返屋企， 不過遇著周末出街， 加上庫存仲有其它生果， 所以， 個幾隻蕉， 無郁過已經出哂梅花點。要快趣消滅佢仲要食埋其它生果， 索性用黎做旦糕。

我就用左最懶方法（唔開發旦器同打旦棒）。係咪好懶呢， 懶得摷出黎又要懶得洗。估唔到最懶既方法， 整出黎既香蕉旦糕都成功喎。仲有， 最懶係無界開， 由得佢自己裂開（之前做牛油雲石旦糕一樣無界）

製成品


材料：
菜油 100G
糖     70G
旦     2隻
香蕉泥 2 隻(我又好懶無壓至泥， 仲有少少蕉肉就照用）
牛奶  50ML
低粉  200G
泡打粉 2茶匙
雲呢拿香油 大半匙

做法：
1）先攪溶糖及菜油 （無用打旦器， 隨手攪， 好快溶）
2）逐隻旦加入攪勻再落另一隻(都係無發旦， 隨手攪）
3）加入牛奶攪勻， 再加入香蕉溶攪勻
4）篩入低粉及泡打粉， 輕輕伴勻
5）放入已預熱180度的焗爐焗50﹣60分鐘即成。

我咁懶， 做呢D長型旦糕都唔會刻意開爐門界佢一野， 由得佢自然爆算。反正自己食， 嘻嘻。

切左幾塊， 加左兩隻蕉， 都唔夠出邊街咁濃， 好明顯出邊買的香蕉糕有加香蕉油啦。不過呢款好軟熟呀， 放左一晚都仲好軟熟， 有陣陣蕉味。下次雖然用懶人方法攪粉， 不過入爐前都係要DUCK一DUCK， 咁切開個糕就靚仔D， 無咁多孔。