魔鬼旦糕附食譜

父親節， 金和銀都沒有， 只有一份心意送比爸爸。就係整旦糕。當然， 最後又比爸爸話， 又有借口整旦糕。

呢次係魔鬼旦糕。好滿意呀， 好好味。

入邊係普通既朱古力雪芳旦糕 （做法按此）， 不過今次無加泡打粉， 改為多加一隻旦白， 即四隻旦白三隻旦黃。一樣發得好高好靚。

攤凍左雪芳旦糕後， 貪心得滯， 分左三層。諗住多D CREAM可以加嘛。

魔鬼旦糕CREAM 材料:
牛奶朱古力粒 ／ 黑朱古力粒各半， 一共50G
淡忌廉 50G （煮起溝朱古力粒用）
糖 15G
淡忌廉 160G

做法：
先隔熱水溶化朱古力粒， 再倒入已徵滾的50G忌廉靜置約五分鐘。後再撈勻成均勻的朱古力漿。
淡忌廉先打起泡， 糖分兩至三次加入再打。直至忌廉出現紋路， 可以停止。夏天要座冰水打， 因為一手一腳打又座冰水， 又怕忌廉溶化打唔起， 所以全程無影相。但其實打約五分鐘， 160G既忌廉都現哂紋路的。當見紋路同忌廉杰時， 慢慢注入朱古力漿（需先待涼， 否則會令忌廉又變返溶溶地好水了）。邊注入邊FOLD IN 伴勻。伴勻後， 就可以忟旦糕了。

今次， 我仲加埋脆脆做餅底。今次餅底好成功， 因為份量唔同左。之前係朱古力同脆脆一比一， 好淋咁。之後兩次（包括呢次）， 都係一比一(不過呢個一係菜油同朱古力加埋＝脆脆份量）。六寸中空模， 我用左60G脆脆， 加40G朱古力粒溶化加菜油20G伴勻。再撈落脆脆到（又係要朱古力待涼才可撈）。整完後， 60G脆脆仲有剩的（不過我做好薄底， 因為唔想食厚餅底）

幫旦糕化粧， 就係先整起塊脆脆餅底， 上搽少少CREAM， 等上邊塊旦糕可以有少少固定。放左旦糕， 再抺CREAM。重覆呢個步驟便可。

呢次仲實驗試下， 用朱古力粒 （約十粒八粒）溶化左。再倒入一個三文治袋（因為份量少， 唔想嘥一個唧花袋）。再係底剪一個少少既洞， 扮做唧袋。係張牛油紙上， 唧約一毛紙大的朱古力點， 再用匙壓平。可按自己鐘意唧多少點再壓想要的花紋都得。搞掂哂後， 捲起牛油紙放冰箱一陣等佢快速疑固。再用刀挑起， 就變左做旦糕上邊的一塊塊卷卷地的朱古力碎片裝飾了。仲好， 唔駛出去買一包又用唔哂（如果只係想要幾塊點綴的話）

睇下， 搞哂朱古力片（其實做左好多塊， 但都放唔哂， 因為六寸中空模都無乜地方放咁多朱古力片）， 仲有多餘朱古力漿做唧點同打圈(雖然核突左D， 不過無師自通忽然興起玩朱古力花， 算係咁啦）


切旦糕真係無乜技術了， 舊旦糕切到唔平， 不過真係有幾層架。

算唔算符合仔仔要求， 要食媽媽整既幾層CREAM CAKE 呢。

祝爸爸父親節快樂。