免搓麵包食譜（港式軟包粉糰）

其實一直都好想整包包架 （當小朋友仲係BB個時）， 因為街買既包， 落左好多化學野至會咁鬆， 翌日都仲軟淋淋。不過之前爸爸反對， 話買左部包機， 邊有位擺， 部焗爐幾年都用唔夠十次（個時）， 所以唔建議買包機。搓包又辛苦又唔識， 所以擱置左自製包包諗法。

直至有日， 無意中發現左坊間（台灣既周老師係其一）， 原來有幾種免搓既造包方法， 嘩， 雙眼發光， 岩哂我呢個唔識撻粉搓粉既人。

試左兩個唔同材料方式， 以下呢個配方， 真係岩哂做港式包 （軟熟）， 另外一個比較外皮硬， 麻麻岩港式包愛好者的我。

軟熟包基本粉糰：

室温水 150G
INSTANT YEAST   1茶匙
高筋粉  300G
黑糖 ／ 白糖  60G
鹽  小許 （最後至落）
奶粉  20G
旦  1 個
菜油 60G

把以上材料撈埋一齊， 變成以下呢PEI野。
 

包保鮮紙雪兩個鐘（放熟肉個層）， 之後， 就會見到堆粉糰變大左。想玩下試下， 用高粉沾滿手指插入， 個洞真係唔會收縮架。即係代表發酵完成。可以造型了。

呢堆係基本粉糰， 要食乜包悉隨尊便。我就試過整咖啡包， 芝麻包， 朱古力包， 提子包， 同埋菠蘿包。



軟架。仲有好靚既花紋 （自己覺得）
菠蘿包都好靚， 同街買差唔多 （又係自已覺得）

呢盤造型差D， 因為係第一爐， 未摸熟點搞辨子包。香腸包又得， 不過軟粉糰我未做過， 反而另一食譜的硬包， 我就試過整香腸包。

造型時， 必須要用沾滿高粉既剪刀或利刀， 係雪櫃盤粉到， 剪合適大小 （我就唔會咁貪心， 剪太大， 因為自已整既包， 經驗所得， SIZE同街買既一樣， 但食完係飽過街買既NNNN倍） 一個拳頭大小的粉糰， 我會一開二做兩個包。唔知大家明唔明。

剪左或切左合適大小粉糰後， 放在已鋪滿高粉既枮板或不沾布上， 用棍輕力碌 （好輕力）， 碌完開始放料， 或求其對合跟手做菠蘿包既包身都得。封口務必向下。跟住放在塗滿牛油的錫紙或糕盤上， 夏天就室温加蓋或保鮮紙發酵半個鐘。冬天就放入已預熱的焗爐 （要熄爐）加水發酵半小時 （都要加蓋保持包包唔會被熱乾）

半小時後， 會見已搓好的包發大左1．5倍。按落去鬆鬆地， 係時候可以塗旦液入爐焗

焗爐要先預熱15分鐘 ， 180度。我經驗所得， 如果比正常SIZE小一點點的包， 我會用180度焗20分鐘， 目測上哂色， 又聞到包香， 就可以食得了。

不過， 菠蘿包就要再加熱（超易菠蘿包皮食譜按此）
從此， 小朋友日日都可以有無添加包包食了。真好。不過， 唔知係咪自已買既黑糖唔夠靚， 我覺得食白糖整既包好味過黑糖包， 但出街買時， 我又鐘意食黑糖包架喎。可能我既黑糖真係唔靚啦。所以整包就無咁好食。