Claire 性格記敍

又摷返電話照黎記下Claire 先。

話說Claire 天性好女人， 出街一定要夾個手袋， 年紀接近三歲時， 唔知點解， 手袋忽然有齊外套＋手巾仔＋紙巾。嘩， 細心過好多港女呀。仲有， 一聽到有人帶佢出街， 第一件事唔係換衫， 而係飛咁快去執手袋， 再把需用物品放齊， 至去揾衫著。

除左呢樣外， Claire 仲好女人架， 出街最鐘意幫手拎野。

一抽二甩咁。

Claire: 我好心幫你攞喎， 你仲咁笑我？？

Claire 有時好氹到人歡喜， 不過佢惡起上黎， 真係嚇死你。睇下上邊副眼神咪知一二。  

Claire: 我其實好温柔架。

除左出街似女仔外， Claire 其實好似老人精咁， 鐘意扮大個女。好似呢日咁， 媽媽帶佢去圖書館， Claire 坐埋一邊，媽媽就負責揾書借返屋企， 當媽媽行埋Claire 旁邊時， Claire 同媽媽講： 呢本書係大個女睇既， 我大個女喇。（跟住DUMP返低個頭繼續睇呢本書囉）媽媽聽到， 都唔知好嬲定好笑。

一啖砂糖一啖屎可以用黎形容Claire 性格。惡起上黎好惡， 但轉個頭又氹返你。所以個個都比佢氹到架。尤其係爸爸， 唔怪得 D 人話， 女兒係爸爸另一個情人黎。

Claire: 哈哈， 好好味呀。呢杯芒果布甸係爸爸買比食架。我食哂LU～～

Claire: 睇下個杯有幾大。

Claire: 好食到連個杯都唔捨得掉呀～～～～不過媽媽望實我要我掉囉～～～

Claire 平時唔鐘意著裙。不過今日帶Claire 出去睇跳舞班資料時， 咁岩比佢見到姐姐著哂表演衫。Claire 就不停講， 我想著個條跳舞裙呀～～～媽媽唯有話， 平時比裙你又唔著， 個條係上台比賽表演用架。如果唔咁講明， 一陣比佢去左學跳舞， 見到無靚裙唔肯跳， 咪死火。呢個妹仔， 有時貪靚起上黎， 好硬頸架。