拉丁舞比賽意外收穫

9 July 16 Isaac 自從升小後，都無再涉足拉丁比賽了。事隔近一年，媽媽終於游說到Isaac試下再參加比賽。抱著測試下自己水平既心態，媽媽一於支持到底。

為尊重Isaac 意思，我地今次只係玩三隻舞，其實Isaac 本黎只係打算玩兩隻，不過導師又叫佢玩哂⋯⋯退而求其次，Isaac 最後玩三隻舞。

先黎個森巴（按此），算係Isaac 最易掌握既跳步。不過，同齡出賽手太多，要奪奬實在不易。幸好我地旨在參與。

第二隻係渣渣（按此），可能呢隻舞既賽手無咁爆，係初賽中，Isaac 居然拎季軍。成功進入決賽，可惜，係決賽中，未能問津。不過都好，叫做有個奬牌拎返屋企囉。

最後一隻，係牛仔（按此），亦係咁多年黎，Isaac 最弱既一項。所以，呢個項目未有奬，都一如所料。

呢次比賽，最大收穫，唔係奬⋯⋯而係，居然係度見到師兄姐。經媽媽查問之下，原來學校的拉丁舞組，也有參加呢個比賽喔。就係咁，明查暗訪之下，媽媽就搭左線，為Isaac 加入學校拉丁舞隊鋪左路⋯⋯日後，唔知Isaac 會唔會繼續跳拉丁舞，不過，係可見日子，Isaac 可以係學校跳拉丁，為學校爭光，應該好過自己暗地裡係私人學校跳掛。