練習故事比賽

22 Feb 16 Claire 好唔容易先入到學校故事組，等左成年，最近終於有比賽可以參加了。不過，老師就要Claire 背熟份稿。過左成個年假，媽媽都好努力幫Claire 背稿，不過，仲有個人仔未背得熟囉（點此）

其實呢個餵食妹，要佢練習真係好難。不過，媽媽醒起，以前哥哥要練習比賽時，都有餅乾做奬勵。所以，媽媽就拎屋企既甜筒餅乾引佢，話做得好，就有得食。咁，究竟上面條片，Claire 做得好無呢？好就唔算好既，但叫做成功背到成個故事囉。都抵奬既。

睇下，個衰妹副餵食樣⋯⋯拎住支甜筒餅乾，古靈精怪咁。

Claire: 好好味呀⋯⋯

 呢支肯定好好味，點解？有人食完之後，好興奮咁同媽媽講，佢要再練習多次講故事⋯⋯皆因佢諗住做多次，又可以食多一支。

是夜，公園有花燈睇，係最後一日了。Claire 呢輪行親去學校，見到D擺設，就話夜晚要黎睇。媽媽見兩兄妹未睇過，索性晚飯後，匆匆忙忙咁去公園逛個圈，比佢地睇下先。

影到好似陳年舊照咁。

鬼鬼馬馬的兩兄妹。

Claire: 媽咪，我FEEL到哥哥又搞我呀⋯⋯

通常Claire反應係⋯⋯狠狠地摵哥哥⋯⋯然後，開展一輪你摵我我摵你既場面。

究竟呢兩兄妹，要打要作對到幾時至識好似以前咁，相親相愛呢？

24 Feb 16 兩日之後，媽媽又要Claire 再講多次故事⋯⋯嘩，兩日之嘛，睇下Claire 進步左幾多。果然越來越好呀。（點此）