K2 學校旅行

5 Mar 16 一年一度學校旅行，終於等到了。Claire 最鐘意係可以同自己同學仔出黎玩。呢日雖然係學校搞，不過都叫做係同同學仔出去玩啦。

學校旅行，當然唔少得舊生哥哥。剛升小一，牛高馬大，行埋落K2生隔黎，寧舍大個人咁。

睇返D相，原來當時既Claire 係有個雙下巴架喎。

成班小朋友就係咁，來來回回行呢條其實係梯級既物體。真係唔知有乜好玩。Isaac 就悶到主動話去公園玩。

Isaac: 等我挑戰高峰先。

 果然有姿勢，有實際呀。

之後，仲擺哂姿勢，要衝上個半圓"山坡"上。（點此）果然高大有著數，咁都比佢衝到。

至於Claire，係呢個公園，一點都唔悶啦。因為有兩個全日班同學仔陪佢玩，睇佢，玩到擘大口，幾咁興奮。

之後，就到班級既親子遊戲時間。所以，我地又要走返去個廣場到集合。

呢年既親子遊戲，好似小朋友體力勞動比以往幾年多。好在Claire 都叫身手敏捷，做得好好（按此）。

當然，唔少得爸爸既勞動啦，要踎低咁行前喎。腳骨力少D都唔掂。

個遊戲好快玩完，但又未散得⋯⋯呢個時候，好在有同學仔媽咪預備左竹蜻蜓呢個玩意姐。

Claire: 我一定要得既⋯⋯點解我次次都飛唔起架⋯⋯

 Claire 玩竹蜻蜓既技巧，仲有好大空間進步。呢個就要留返爸爸教佢了。因為媽媽都唔係好識，哈哈。

當成班K2 係廣場玩緊個時，Isaac 無野好做，唯有同舊同學仔坐埋一齊，齊齊等細佬妹玩集體遊戲⋯⋯

Isaac: 好悶呀⋯⋯無野好玩。

Claire: 哥哥，你好悶咪一齊出黎唱歌仔囉⋯⋯

玩到中午，我地半日班同學仔，係時候要坐埋一齊黎個野餐了。一人整一味，好開心。

食飽飽，仲圍埋幾個半日班同學仔，一齊玩拋手巾，Claire 跑得好快下喎。唔知下個目標係邊個呢？

等到臨走，終於等到爸爸出場了。夾住兩個同學仔狂走⋯⋯小朋友不知幾興奮。既刺激又緊張。事後，爸爸話好攰喎⋯⋯