首爾SHOPPING。玩雪之旅 2016 。DAY 5 。晨靜樹木園

15 Feb 16 呢日氣温係負四度。我地無懼冰風陣陣，照樣出發去晨靜樹木園賞夜燈。雖然行程係遠D，接駁要有時間限制，加上天寒地凍，但我地去完，覺得真係不枉此行。可惜呢個夜燈，呢一年只係去到三月底。

 我地去程要就亮燈時間，加上咁凍天氣，唔想企咁早就係樹水園食凍柑。所以，去個時，我地用最轉折既方法，就係由十里站(208)轉K線去上鳯（K120)再轉P線去到清平站（P132)。去到清平，仲要轉巴士先去到晨靜樹木園。我地去到，未有車，企係度食西北風，睇我地衣著咁厚實，包到實一實，就想像到個度有幾咁凍。

一落巴士站⋯⋯嘩，好靚呀，鋪哂成層雪。仲要唔係假雪喎。堅架喎。好有雪景FEEL呀。見到咁樣，之前點轉車，都係值既。

Claire: 仲唔快D玩掟雪⋯⋯

Claire: YEAH，我掟到你隻腳。

 一場黎到，點都要同個地標影下相既。

Claire: 唉⋯⋯好攰呀⋯⋯影夠未呀？我想繼續掟雪呀。

 有個小妹妹，就係咁，不停咁掟雪（按此觀看）

Claire:我要掟你呀⋯⋯
爸爸： 唔好掟阿媽呀⋯⋯

 晨靜樹木園真係好靚。媽媽絕對推介。十個讚。咁靚既景，梗係要留多D家庭照啦。

咁浪漫既佈置，真係好岩情侶黎。

呢個小妹妹，當我地好醉心於夜燈景時，佢就好努力咁執雪⋯⋯睇，對手襪係白哂既。

原來最靚，係樹木園既中庭位。真係越夜越靚，仲越夜越凍TIM。Isaac 就凍到條頸巾都無主動除過，咁真係幾凍下。

正當我地望緊咁壯觀既燈海時，有個人就好努力咁幫園區清走積雪（點此）

另一端，全紫海。一樣好靚。

靚到媽媽要攬住條鯊魚影相TIM。

連造工精細既蝴蝶，都有好幾隻呀。

因為要趕火車（我地回程由清平坐火車返龍山站，快又舒服），所以，我地趕住要坐七點鐘既SHUTTLE走。係呢度留左一個鐘左右，真係好靚，不過太凍了。

臨衝去巴士站，係尾場位，見到條粉紅色通道。好靚好浪漫呀。

咦，走呀走呀⋯⋯走到出去園區，點解有個小妹妹頂帽，會變成白色既？

匆匆忙忙黎到呢度，如果可以逗留耐少少，咁就更加好了。因為真係超美喔。