一家貓頭鷹: 7月 2013

2013年7月31日星期三

ENJOY 生日會

14 Jul 13 同學仔請去生日會，雖然媽媽唔認識對方。不過難得暑假可以同同學仔玩，病住都要去啦。一去到會所，嘩，好多兒童玩樂設施呀。Isaac 玩到唔願入房開PARTY 。幾經辛苦至捉到 Isaac 入黎同主人家影張相。

Isaac: 快D 影完我仲要出去玩架。

其實都唔駛出去啦，係間房都大把波玩。幾快笑到咁既樣。

同同學玩，笑容最燦爛。

Isaac: 好好玩呀～～～

又黎扮超人了。媽媽無眼睇。

女同學都要射，真係無眼睇。

嘩，切旦糕時間到了。呢刻係 Isaac 全程最安靜，定定地既時候。

Isaac：唔～～～食邊舊好呢？

人地影生日相，有人擘大口搶哂鏡。

Isaac: 快D切啦，好心急呀～～

Isaac: 睇在旦糕份上，我笑下同你影張相啦。

嘩嘩嘩，食到旦糕了，幾咁靜。係媽媽可以抖下氣的時候了。

連手指上的旦糕都唔放過。如果食飯食到咁乾淨，媽媽就開心了。

食完旦糕，繼續激玩。媽媽病病地，都費事追住 Isaac 加埋同學仔的玩照了。玩到近六點，我地至搭車返歸沖涼洗白白。兩個小朋友已經攰到九彩。媽媽更加攰，因為病嘛。爸爸要返工更加唔駛講啦。不過，難得一聚，阿仔又開心，都值既

孤獨的生日會

14 Jul 13 Claire 呢日下午，陪哥哥去生日會，不過撞正下午茶時份， Claire 好似睡魔急CALL但又頂住唔瞓。搞到一面木獨咁款。

幾COOL。

Claire: 無人陪我玩，等我拉高件衫引人注意先

Claire: 點呀，仲未有人黎陪我玩既

Claire: 媽咪，我好好好悶呀，哥哥唔陪我玩既？

同主角影返張相先。不過兩兄妹一臉木獨，真係同生日會氣氛差天共地。

好在生日會有大量汽球執。Claire 都唔執輸。

終於等到小朋友最愛環節，食旦糕。幸福的Claire 有爸爸餵。

Claire: 唉，我悶到想瞓陣先，你地走個時叫我起身啦

呢次去完生日會，哥哥玩到超興𡚒。阿妹就得個跟字，因為無朋友仔識妹妹，唯有佢一個人係咁吊住哥哥，不過依然係一個人自己周圍玩。

2013年7月30日星期二

12 July 13 年度結業禮，本來媽媽無打算去，因為怕悶。點知老師叫媽媽訂定入場票先，唔去一回事。好，就訂兩張。後黎，老師通知媽媽， Isaac 因為上學期學業表現優異，有奬拎，仲要媽媽陪佢上台拎。又諗住爸爸應該唔會去，點知爸爸好好喎，又請假去，好在媽媽同Isaac 同學仔媽媽交換飛。爸爸可以一齊去。

係後台罰企左足足兩個鐘， Isaac 至可以出黎拎奬。成年黎講，好滿意學校安排，唯獨係呢次真係萬萬不滿，要K1小朋友罰企又唔可以大叫喎，小朋友圍埋實玩到傻又大聲，又怕嘈住外邊觀眾，呢兩個鐘，真係度秒如年。一出台， Isaac 望向台前揮手，好搞笑。唔知佢想同邊個打招呼呢。 DSCN6311

Isaac: 爸爸係邊呀？

DSCN6312

媽媽：望住爸爸笑啦

DSCN6314

Isaac: 勉強笑下啦，企到我好攰呀

上下學期加埋，六個同學攞學業奬，一個同學操行奬。媽媽心諗，好在唔係豬肉奬姐，咁都叫有意思下。雖然Isaac 下學期無奬拎，都叫做一個經驗比佢知，以後做完功課要温書（因為Isaac 成日抗拒拎書出黎温），又等佢知道，做功課要用心，唔係求其快就算。 DSCN6315

企左兩個鐘，上台一分鐘。之後下台欣賞完節目，出到去見到同學，影返張鬼馬合照先。 DSCN6318

之後，媽媽見手上仲有雪糕卷，就話過去食返支雪糕先，因為雪糕卷過期架啦。 DSCN6321

Isaac: 食完雪糕，比我扮下可愛先啦

Isaac: 點解我頭先支雪糕無呢杯咁大既？ DSCN6322

希望Isaac 來年繼續努力比心機學習。唔好成日玩玩下就算啦。

2013年7月27日星期六

大棠宿營

10 July 13 係大棠裡邊，晨早就比人摷醒去食早餐。第一次同枱食全程大人早餐加無奶飲。都食到個咀爆哂。

Claire: 我仲想夾個件呀。

食飽飽落雨，唯有去兒童室玩個夠。

Claire: 媽咪，入黎一齊玩吖。

玩左好耐，又行下又出汗，卒之又買雪糕。Claire 呢兩日係咁食雪糕，真開心。
仲要死人都要爭住一個人自己拎住獨食。

Claire: 唔好影我食野啦。

之後，我地去左參加環保紙製作班。係大棠渡假村提供的，免費架。Claire 開頭好專心咁倒紙漿既。

印下印下，印乾紙漿既水份。

Claire 開始黎料了。係咁同哥哥笑。

媽咪：Claire，望住鏡頭影返張吖

有相為証，見到異性就雙眼發光。大個點算。

呢張就係媽媽同Claire 合力造既再造紙，不過未乾既。我地照帶屋企，諗住比兩兄妹做勞作用。點知妹妹二話不說，乾左之後撕碎哂。

因為自己造既再造紙未乾，我地用大會提供既再造紙玩下勞作仔。妹妹又學人畫下畫下咁。

兩日一夜既宿營咁就完左。雖然無野玩，不過媽媽攰到隻野咁。呢個宿營係暑期的開始，暑期活動接著多蘿蘿呀。

2013年7月25日星期四

芝麻雪芳旦糕（附食譜﹣改自韋太）

屋企芝麻粉就黎到期，為左消埋佢，拎左黎做芝麻雪芳旦糕。食譜係改自韋太既，韋太個食譜係兩個九寸SIZE。又唔想食咁多，所以，減佢一半，用返六寸中空模黎焗。係無咁高，但好過特登買細模焗吖嘛。而家做雪芳旦糕已經唔再用化學野﹣﹣泡打粉。改為加多一隻旦白，最近幾次都成功發得起仲好鬆軟，真開心。可惜係屋企把長刀唔夠利，切包切旦糕仲係唔夠靚仔。
照片-167

材料：
低粉 30G ＋黑芝麻粉 20 G
旦白三隻＋砂糖 20G （比韋太少落糖，因為覺得芝麻本身都夠香甜，怕甜得滯）
旦黃兩隻＋砂糖 20G （其實韋太用五隻旦，我其它材料減佢一半，但旦唔識減到兩隻半，所以索性兩隻算）
鮮奶 20G
菜油 10G

做法：
1）低粉芝麻粉過篩兩次備用。旦白旦黃分開兩個不同器皿盛載，旦白個碗特別要抺乾淨水份油分，同埋分旦時，千萬唔好滴左旦黃汁落旦白到，否則會打發唔起的。預熱焗爐180度。
2）韋太係先打旦白備用。我就唔敢，自問廚藝無韋太咁叻，怕備用完等我伴勻粉時，旦白既空氣消左泡就弊。所以寧願煩少少，洗多轉打旦器。所以，我係先打發旦黃，再分兩三次加糖打至淡白色。鮮奶及菜油按次序分兩三次係盤邊倒入，每次注入少少要先伴勻再落。
3）篩入粉入旦黃漿，輕手伴勻至無粉粒。備用。
4）旦白打發至起泡，落1／3糖，待旦白泡變細密再落餘下1／3。待旦白泡細到見唔到時，落最後1／3糖。繼續打發至企身，即倒轉盤都唔會跌旦白為止。
5）輕手筆1／3旦白霜入粉漿內，用摺叠方式由盤邊向中間摺入方法，伴勻旦白霜及粉漿。
6）餘下旦白霜輕手倒入 5），再用摺叠方式由邊向中間摺入FOLD IN。伴勻所有旦白霜及粉漿。之後倒入焗盤，輕手DUCK一兩下DUCK走空氣，以消大泡。之後入焗爐焗25分鐘。取出倒轉至少一小時，待全涼後方可脫模。否則雪芳旦糕會扁哂的。