求其之作：焗芝士薯溶蕃茄豬扒

本來諗住整焗豬扒飯。點知老公忽然話唔返黎食飯喎， 所以都係唔好焗豬住。諗諗諗下， 不如輕輕地焗下薯蓉算。

呢個係懶人版， 因為裡邊一樣係豬扒(無計， 工人一早溶左兩塊豬扒， 唔焗住整唔得， 豬扒溶左兩日了， 唯有一次過整哂， 塞飽自己）。因為自己食， 麻麻地鐘意食油膩野， 所以， 底個D豬扒無煎過無下過鑊， 只係切小塊（本人不愛大舊肉）同飯一齊蒸熟， 係咪好懶呢。

蒸熟左豬扒， 加埋一個蕃茄切碎略煮加左汁， 撈埋放碟底。煮飯同時， 都蒸埋薯仔， 壓扁乜調味都無落， 原汁原味只係加左好少好少香草。放入唧袋， 圍邊唧花。主角其實係中間個堆馬蘇里芝士。因為我只愛吃芝士， 嘻嘻。

材料全部熟哂， 只係焗香佢姐， 加上我部焗爐好有問題。所以， 我係放到最頂個層， 用成220度焗到變色。都唔得， 最後， 要去到250度至變到芝士金色。正呀。最正係， 一向唔食薯仔既阿囡，居然同阿仔爭食薯溶。

見呢次唧花唔靚， 兩兄妹又鐘意食薯溶。翌晚又黎多碗， 一人一盅。仲要每人唧返自己個盅薯溶。
 呢次唧得好少少（頂個三粒）， 原來係唧左花出黎， 要繞一繞個圈， 再唧第二個花， 咁至靚仔架。呢次餡料係蕃茄撈三文魚， 唔諗下計仔煮三文魚唔得， 阿仔見到實唔食。估唔到， 呢次佢又估唔到， 好野。又食左三文魚落肚了。