簡易駌鴦炒飯（懶人版）

前排大家樂有30元駌鴦炒飯， 激發左我諗起， 其實都可以整下氹小朋友食多兩碗飯。所以， 呢日好簡單， 只係買左蕃茄就搞掂。因為冰箱長期有雞扒同蝦仁看門口。又有新鮮粟米看門口。呢堆都係仔女最愛的餸黎。呢次駌鴦炒飯無特登買青豆同蘿蔔粒， 因為兩個小朋友都唔食， D汁又唔會遮住青豆， 最後又係挑返哂出黎就嘥哂。所以， 只用有限度佢地鐘意既材料黎煮。

一句講哂， 原來好易整架咋， 最難， 就係太極圖案， 所以， 倒左三碗都無碗有太極樣。心灰。
茄汁料：
其實就係平時既蕃咖雞絲咋嘛。
雞扒一塊切條
洋䓤切條 （不過我就切粒， 因為仔女唔食， 但蕃茄汁可以遮到洋䓤粒， 唔怕佢地挑出黎， 所以有落， 但食時係睇唔到的）
粟米粒適量
鐘意可以落埋青豆個D
蕃茄一個切細件
鐘意可以落埋茄汁， 唔駛煩。不過屋企一向唔會用呢D化學汁料， 自己都整到蕃茄汁， 所以用返新鮮蕃茄整汁算。

整法：
熱鑊下油爆香洋䓤粒， 後加雞肉炒熟。再加切細左既蕃茄落去DOU。用鑊鏟壓扁蕃茄出汁， 用半碗水加適量生粉， 糖及鹽伴勻下鑊。放粟米一同煮至汁略杰收火便是。

白汁料：
蝦適量 （我用左十幾隻大既， 覺得好多）
粟米粒適量
其實我想落埋叉燒粒， 不過工人唔食豬。所以無落。
可以加埋蘑菇粒， 不過屋企無。費事特登買。
鮮奶 1／4杯

整法：
熱鑊炒熟蝦。再落粟米粒， 用鮮奶1／4杯加2／4水伴勻粟粉， 鹽糖。又係煮至汁略杰。

我就係先煮白汁再煮茄汁粒， 費事洗鑊吖嘛。超懶人做法。

煮好哂兩味後， 用錫紙扭個太極紋放碟或碗， 分兩邊注入茄汁或白汁， 便成為駌鴦炒飯個料了。當然， 炒唔炒飯， 適隨尊便。

個人覺得， 餡料太多， 令到倒汁時， 好難整到好似街咁易有太極紋。不過自己食， 又想多D 料。真係好難取捨呀。

但呢味餸， 唔會再有下次。因為食食下， 忽然諗起， 平時食飯我都唔比小朋友撈汁食飯， 而家呢個駌鴦炒飯便相撈哂成碗汁， 真係無下次。