簡單版上海小排骨菜飯

有次行TASTE見豬肉六五折， 仲平過街巿喎。選左舊有軟骨既骨排。整左味好耐無食過既鎮江小排骨。忽然又諗起爸爸以前成日出街叫菜飯。不如一齊整， 扮下上海菜飯先。

鎮江小排骨材料：
小排骨適量
鎮江醋五湯匙
冰糖 一小粒
糖，鹽適量
水一杯

小排骨飛水去味。起鑊略炒小排骨，後加水一杯及冰糖煮滾， 滾後加四湯匙鎮江醋， 糖鹽一同小火忟煮30分鐘， 試味可以後， 熄火焗至臨食飯時， 再開細火煮30分鐘， 最後五分鐘下一湯匙鎮江醋。最後再落多一匙醋係想D骨更香醋味。

菜飯材料：
小棠菜適量 （多有多菜少有少菜所以豐儉由人）
老火湯用黎煮飯 （無特登買上湯， 只用屋企個日飲既湯黎煮飯）

做法：
因為唔想菜焗得太耐， 所以， 我就先切碎菜， 好似平時淥菜咁， 先淥莖，後淥葉。隔水後放入已煮好飯一齊撈勻。其實淥菜時可以落鹽油調味。不過屋企有小朋友， 我地平時食慣無蠔油既菜， 所以， 呢次菜飯我都無調味。只係靠老火湯既味咋。

簡簡單單又一餐， 估唔到呢味菜飯好受小朋友歡迎， 話咁快就食哂碗飯了。