保良局大棠渡假村 DAY 2

10 July 13 晨早摷醒鴨仔起身， 因為營裡提供既早餐係8：15分開始， 8：45分就完。仲早過平時呀陰公。超級後悔訂左早餐。但訂左又無理由唔去食。不過去完仲後悔， 原來係一碟腸粉加兩碟炒面加一桶無味的皮蛋粥（五個人分咁多樣喎）。計返每人十四大洋， 算抵掛， 但計返總數又唔係咁抵。好在又係自備左零食， 食完呢個早餐， 一齊返宿舍再開餐。

開完餐， 熱到死死下， 唔知點解又走左去玩個兒童遊樂室。基本上， 呢日成朝都係呢間房渡過。因為想去踩單車， 但又忽然落雨， 即係唔駛踩啦， 坐係裡邊嘆冷氣， 鴨仔玩到傻， 媽媽眼瞓到傻。

 Isaac: 你唔好撞埋黎呀
Isaac: 我要入油先～～～

呢架用腳踩既車， Isaac 話佢學校都有， 所以， 佢好駕輕就熟咁踩。

磨下磨下， 好辛苦至等到十二點， 因為媽媽之前約左環保再造紙環節係十二點。諗住玩完就離營（我地無訂午餐， 好在無訂咋， 兩餐都咁難食）

媽媽中學玩過再造紙， 不過小朋友未玩過， 所以大棠打黎問參加邊樣時， 都係選左樣可以嘆住冷氣玩既再造紙安全D。

放碎紙入攪伴機， 對於Isaac 黎講係新奇玩意。平時媽媽係屋企只會攪食物咋嘛。

攪到變漿咁。但Isaac 睇到入哂形。

Isaac: 咁攪笑既～～～
卒之等到自己落手做了。 我地做左兩張再造紙， 拎埋返屋企～～不過最後比阿妹係屋企撕碎哂。

我地自己做既再造紙未乾， 所以， 當局提供左兩張再造紙比我地， 同埋一大盤樹葉比我地DIY。
勞作係Isaac 最專心環節黎架。
話咁快， 完成左一張紙。

搞下搞下， 我地玩到近一點至離開去執行李走。跟住打的回府， 兩兄妹已經奈不住周公， 係的士到瞓左， 飯都唔駛食。大棠係細左少少，而且玩意唔係咁岩幼兒玩， 下次再BOOK其它營先。