結業禮領奬

12 July 13 年度結業禮， 本來媽媽無打算去， 因為怕悶。點知老師叫媽媽訂定入場票先， 唔去一回事。好， 就訂兩張。後黎， 老師通知媽媽， Isaac 因為上學期學業表現優異， 有奬拎， 仲要媽媽陪佢上台拎。又諗住爸爸應該唔會去， 點知爸爸好好喎， 又請假去， 好在媽媽同Isaac 同學仔媽媽交換飛。爸爸可以一齊去。

係後台罰企左足足兩個鐘， Isaac 至可以出黎拎奬。成年黎講， 好滿意學校安排， 唯獨係呢次真係萬萬不滿， 要K1小朋友罰企又唔可以大叫喎， 小朋友圍埋實玩到傻又大聲， 又怕嘈住外邊觀眾， 呢兩個鐘， 真係度秒如年。一出台， Isaac 望向台前揮手， 好搞笑。唔知佢想同邊個打招呼呢。 Isaac: 爸爸係邊呀？

 媽媽：望住爸爸笑啦

 Isaac: 勉強笑下啦， 企到我好攰呀

上下學期加埋， 六個同學攞學業奬， 一個同學操行奬。媽媽心諗， 好在唔係豬肉奬姐， 咁都叫有意思下。雖然Isaac 下學期無奬拎， 都叫做一個經驗比佢知， 以後做完功課要温書（因為Isaac 成日抗拒拎書出黎温）， 又等佢知道， 做功課要用心， 唔係求其快就算。

企左兩個鐘， 上台一分鐘。之後下台欣賞完節目， 出到去見到同學， 影返張鬼馬合照先。

之後， 媽媽見手上仲有雪糕卷， 就話過去食返支雪糕先， 因為雪糕卷過期架啦。 Isaac: 食完雪糕， 比我扮下可愛先啦

Isaac: 點解我頭先支雪糕無呢杯咁大既？希望Isaac 來年繼續努力比心機學習。唔好成日玩玩下就算啦。