加醋煎既PANCAKE

有日無意中見到有條食譜， 係用白醋整既PANCAKE， 咦咦咦， 雪櫃有支白醋無乜用喎， 阿仔又鐘意食麥當當既熱香餅， 不過最近又變相加價， 兒童餐由三塊變兩塊。賣成21元， 好貴呀。

咁不如索性係屋企實驗下先。

材料：
3／4杯奶
1湯匙＋大半湯匙白醋

白醋加入奶後， 靜止五分鐘， 奶會有酸味變杰， 變左係BUTTERMILK PANCAKE既BUTTERMILK了。揾來既食譜係落2湯匙， 第一次落足， 仲有酸味（可能糖我少落左， 冚唔到酸味）， 所以， 第二次再整， 無落足兩湯匙， 味道剛好。

五分鐘等BUTTERMILK時， 係時候要執定以下材料：
1杯低粉
1湯匙 ＋半湯匙糖 （之前試過一湯匙， 食到醋酸， 第二次加返半湯匙， 無醋酸）
少許鹽
1茶匙泡打粉 （令PANCAKE發起）
一隻旦

溝哂所有材料再篩入低粉， 撈埋就得， 撈時可能見到粉漿仲有少許粒粒， 唔駛理架。係正常的， 撈得過頭仲消左泡泡發唔起。因為加左泡打粉， 順手撈埋就有泡泡見到了。

落鑊煎一邊見面有泡泡出現， 即可以反另一邊煎一陣就得。
貪得意係12元店買既煎旦形模， 用黎煎PANCAKE， 因為未整果醬， 求其唧D朱古力醬。卒之最快食左既， 唔係PANCAKE， 而係朱古力醬囉。