YOHO MALL 夏水禮2016

29 Aug 16 暑假尾聲，日日都好好好忙。趁暑假就完結，媽媽約左兩個好耐無見既朋友仔一齊去YOHO MALL玩下夏日下水禮。出發前，齊齊食個LUNCH先。呢間餐廳咁岩PROMOTE緊，LUNCH可以加幾蚊食脆皮雪條。岩哂Claire. 

Cliare: 呢個先係我正餐呀。

一行五位小朋友，齊齊出發去YOHO⋯⋯男孩子一見呢個SETTING，即刻撲上去一人一個喇叭。難為兩位女孩子，幾咁無奈⋯⋯

Claire: 咁我玩邊個呀⋯⋯好衰架，唔比人玩。

準備好，就出發去玩LU～～

Claire: 唓，有乜好玩姐⋯⋯無人陪我玩。

起初以為YOHO MALL 呢個宣傳到好似好好玩既夏日下水禮係好吸引好好玩，點知⋯⋯流流地囉。係，佢係提供雨衣水鞋，仲話邊盪鞦韆邊淋水⋯⋯不過，有圖為証啦，呢兩個小朋友，邊有濕到呢？連地都無濕呀，哈哈哈。

Isaac: 都無水⋯⋯我可唔可以除雨褸呀，我好熱呀。

Claire： 係囉，都唔好玩既。

Isaac: 妹妹，睇下，我盪得幾高！

Claire: 哼，高咪高囉，我唔想同你玩呀！
Isaac: 哎，阿妹又發脾氣啦。

少女心事難捉摸。Claire 明明仲係一個幼兒，點解佢個心一樣咁似海底針架⋯⋯由朝到而家，好似無一張相係笑架喎。

Claire: 都無人同我玩，哼～～

咁又係既，話哂係哥哥舊同學，佢地出親黎，都好似唔撩Claire 玩既～～難怪有個人成程鼓埋泡鰓。

Isaac: 係佢自己唔同我地玩姐。
Kings： 唉，我唔同女仔玩既～～

呢個水活動真係勁流。我地不停咁FING千秋，都無濕過。天氣又熱，大家都好掃興，已經玩到唔想玩，好想離開，最後，唯有急急腳走返入商場，玩其它遊戲。原來商場入面，仲有鯨魚小火車架⋯⋯不過，要排半個鐘以上囉。真係想講粗口⋯⋯之但係，都流流地。但班小朋友反而最鐘意玩呢架小火車。

Isaac: 係呀，可以自己控制快慢吖嘛。

有個人仔對腳唔夠長，唯有出呢招⋯⋯

呢邊既鯨魚小火車有兩組，Claire玩完小型，就再排大火車。無錯，外型差不多，但真係大⋯⋯因為，要媽媽出動，Claire 先可以勉強踩到。

媽媽： 你踩唔踩到呀？

正因如此，終於來了一幅親子照。就因為Claire 對腳唔夠長的關係，哈哈。

玩完火車，幾個小朋友改陣地，去左玩轉轉椅。

咪睇Claire 咁木獨。其實佢被轉得好開心架，唔信？按此看片睇下啦。至於牛高馬大既Isaac，就無人推啦，要自己幫自己。吖，佢又推得自己好純熟下喎。（按此）

最後，我地去埋沙區玩。YOHO MALL賣廣告，講到自己個夏水區好多水玩⋯⋯WELL⋯⋯又講自己有個七彩沙池。唔⋯⋯都幾七彩下，不過同想像有出入囉。

Isaac: 但我地都玩得好開心呀。

只見各小朋友好用心咁堆沙砌沙堡。咁，繼沙灘後，呢度係另一個可以玩沙既地方黎既。都幾難得架。

Isaac: 媽咪，你估下我想砌乜野？

三個小朋友，臨走，終於可以無界蒂咁一齊玩了。Claire 終於投入哥哥同學堆之中⋯⋯可惜，下次出黎，又要一輪WARM UP先可以玩得盡興。