學校旅行

20 Dec 14 一年一度學校旅行終於等到了。猶記得 Isaac 仲係K1個時，同Isaac 仔講，翌日我地去學校旅行了。Isaac 一臉疑惑地問： 下，咁我地咪瞓係學校囉。

哈哈哈，諗返真係搞笑，好可愛。皆因K1之前既Isaac，印象中既旅行，就係一家人坐飛機瞓酒店。唔知道有本地旅行呢回事。經過個次，佢應該明白，乜野叫學校旅行了。

今年係Isaac 最後一年學校旅行，今次名正言順有妹妹陪同一齊去（以往妹妹以家屬身份去，今年妹妹以學生身份去）。所以，今年既合照，Isaac 係捉住妹妹影架。幾有哥哥FEEL。

呢次旅行係有家教會就職禮，可能避免大家太悶，所以後期加插小朋友唱歌。咁家長就有排忙了。

Isaac: 雖然我唱緊歌，但我對眼有射住你地架，唔好成日影我啦。

 唔知點解，每次Isaac 唱歌都係木無表情，好鬼唔ENJOY咁。

當大家都郁身郁勢，依起個咀唱時，Isaac 仲保持儀態囉。

Isaac: 都叫你唔好影我囉⋯⋯你影住我，我梗係唔唱啦。

（K3 唱歌片段按此）

Isaac: YEAH~~終於唱完。

 是日旅行，居然出奇地有大抽奬，Isaac 出奇地抽唔到奬（媽媽以為Isaac 連咁少位既旅行都抽到有份去，應該有運拎奬嘛）。唔緊要，學校每人預備左一小份禮物。人人有奬，永不落空。

我地之前黎過大棠，所以Isaac 特別記得有個遊戲室，死人都要扯住同學入黎一齊玩。

學校旅行，無理由呢係遊戲室架嘛，於是我地聯群結隊去踩ROLLER。其實我地都唔識踩，媽媽一心諗住死啦，自己又唔識，Isaac 又咁細膽⋯⋯點知，原來有D野真係唔好睇小。

Isaac: 睇我幾型！
媽媽心諗： 一陣你就知⋯⋯我仲驚過你呀，點算呀。

開頭媽媽扶幾步，跟住自己行。

之後，就可以乜都唔扶夠膽行出黎 （按此觀看）

跌倒都唔怕，企起身又一條好漢，呢次行得耐左，仲自然左TIM。（按此觀看）

媽媽又一次從心底裡佩服Isaac，膽色過人仲學野掌握得好快TIM。

飯後，繼續同同學仔拉拉扯扯。

不過CASEY個樣好似想打交咁款，一臉惡死，同Isaac 笑笑口爭咁遠。

玩完又拖住齊齊行去繩網玩。可能今朝太早起身，個個都擘大口既？？？

呢個年紀，拖住同學最開心，大家拉拉扯扯嘻嘻哈哈。

睇下呢班純真既小朋友，一見呢塊板，個個都飛過去霸位。Isaac 無啦啦走出黎⋯⋯原來係睇下自己個頭係乜野公仔喎，笑死。

Isaac: 快D跑呀，前邊有野玩呀！

 點解Isaac 笑得咁開心？

按此觀看咪知點解有人四萬咁口囉。

玩玩下，又走左去隔離個秋千架。

去年至學識點坐呢D千秋既佢，似乎坐得好純熟咁。控制自如，完全唔駛阿媽推。

嘩，終於黎到呢個繩網了。幾條繩，以前K1時同佢黎，完全唔敢玩亦唔識玩，而家K3, 完全唔駛人教，仲玩過不亦樂乎。

 

Isaac: 嘩，媽咪，你睇下我～

跟住又玩玩下，無啦啦走去玩波。 呢日，Isaac 全程都好照顧CASEY細佬，真係一副好哥哥樣咁，如果係屋企，都係咁，唔恰阿妹，就更加好了。

個波去左邊？原來穿緊針呀～～勁喎。

自小Isaac 體能過人，真係無同學仔夠佢跑。難怪 Isaac 成日想參加跑步比賽。可惜而家要參加跑步比賽，都要出到老年咁遠，但跑一分鐘就走。爸爸話唔去好過。睇下遲D佢入小學，希望可以入到田徑隊拉。

首次學校旅行

20 Dec 14 呢日係一年一度學校旅行。好似去年咁，呢年旅行又係要抽籤。好在Claire 托哥哥福，靠哥哥抽到至有得去。雖然無得全班去玩，不過叫做Claire 人生第一個學校旅行，點都開心D既。

K1 K3分開坐⋯⋯好在指左爸爸去揾Claire 同學仔，有得一齊坐。否則爸爸乜人都唔識，真係悶死Claire都似。

其實呢年旅行，係搞埋家教會就職禮。小朋友呆坐左一陣，好在有得輪流上台唱下歌仔。咁家長無咁悶（可以影相吖嘛），小朋友又有得郁下。

K1 唱歌片段按此

企第一行既Claire，又唱又做足動作，交足功課架。

Claire: 駛乜講，我醒目女黎架嘛。

各級小朋友唱完歌，又到親子遊戲時間。居然係比K1勝出左。Claire 做左其中一個代表出去領奬。

Claire: 好野，一陣有紫菜食。等我渣實D先⋯⋯

Claire: 終於等到分紫菜了⋯⋯一陣有得食。

搞左好耐，旅行時間終於到了。之前大家洽議好，爸爸負責陪妹妹；媽媽就陪哥哥。咁兩兄妹都可以全日同佢地各自同學仔玩。呢張相，媽媽覺得影得好靚呀～～

Claire: 老師話SIR滑梯要安全，而家有老師係度，今次我唔可以爬上去架

走呀走，小朋友最鐘意係公園跑。

Claire: 唉，等我走慢D啦，後面個浩朗追唔到我架～～

今次旅行，每班其實得六七個小朋友可以去，跟住一自由活動，各自四散，呢度只係可以影到幾個咋。

Claire: 點解我要企既～～

Claire: 哈哈哈，有人好似想跌倒咁呀。

自由活動時間其實得一個鐘，之後要去飯堂開餐。

Claire: 哎呀，校長主任坐我後面呀～～

Claire: 等我大啖D食比校長睇至得。

Claire: 嘩，原來好難食架，食到我咀都WEAR埋。

飯後，Claire 變左同女孩子一齊玩。忽然顯得好含蓄咁。

嘩，有同學買棉花糖，睇下衰妹笑到四萬咁口，就知佢幾咁HAPPY。

邊個食棉花糖，食到自己變左聖誕老人咁？

之後，幾個同學仔走左去跳彈床。完全難唔到Claire 啦。平時都有跳開架嘛。

Claire： 不過點解呢度要繞埋手既呢？

跳呀跳，希望你越跳越高。

明年旅行，應該無阿哥份了，到時爸爸媽媽可以一齊陪Claire 同同學仔玩。

聖誕 BBQ PARTY

18 Dec 14 呢日，Isaac 去同學仔會所玩，因為我地夜晚有個聖誕PARTY呀。特登早少少去，因為Isaac 話要去呢個會所玩喎。盡顯好哥哥本色，同妹妹一齊玩。

Isaac: HELLO, 我地一齊渣火車呀。

媽媽話，三個一齊擺最型既POSE，睇下邊個最有台型？

玩到癲既Isaac，至會有個四萬咁口既笑容架。

玩到咁上下，齊齊上平台燒野食。撞正呢日真係好鬼凍架，大家都做足禦寒措施，著哂羽絨去食野，真係有點搞笑。

Isaac: 但係都無阻我地咁開心既心情喎。

Isaac： 大家聽我講，你地有無試過著羽絨係平台食野先？

細路仔，玩大過食，其實大家係咁倚食左少少，個個喊飽，走哂去玩。呢個情景，忽然好似街邊童黨講數咁款。

嗱，成班童黨郁手啦。

無啦啦阿妹變左目標，比人訓話咁TIM。

Claire: 媽咪，我派朱古力比小朋友食呀。

Isaac 見阿妹派，又一齊派。

玩完一大輪，大家準備走，臨走梗係玩下應節活動 －－交換禮物。Claire 係禮物面前，笑得幾開心！

成班朋友仔排哂成龍，兩位主持媽媽頭都大埋，唔知用乜方法去交換禮物好。

呢次交換禮物，係唱歌仔傳紙仔。（按此去片）

估唔到呢班小朋友，都算合作，無太緊張爭禮物。

拎左號碼紙既小朋友，又未可以拎禮物住，唯有坐埋一邊談下心。點解咁MAN既⋯⋯坐得。顯得Isaac 好斯文，不過呢三個姿勢，都係好「佬」FEEL咁。

Claire 抽到由CASEY細佬送出既禮物一大盒，原來係薑餅人材料粉黎。我地後黎聖誔有一齊玩。好好玩⋯⋯細路仔覺得。

 而Isaac 同芊攸就好似真正交換禮物咁，Isaac 份禮去左芊攸到，芊攸份禮就去左Isaac 到。好在兩個既禮物，都係FOR 小學用。我地真係實用性高既媽媽呀，哈哈哈。

呢晚，兩兄妹玩到唔願走。卒之，結果係比媽媽邊行邊罵，加埋罰兩兄妹無得玩幾日。玩具比媽媽收起哂。等佢兩兄妹知道，以後要走既時候就要走，無得再扭。希望兩兄妹都學到啦。