鯉魚門渡假村宿營 （第一天）

21 Nov 14 呢日係學校平日假期，媽媽忽然又諗起可以近近地租本地渡假屋住下。上次我地住大棠，兩兄妹不知幾咁開心，當正係旅行。今次我地唔租大棠LU，改為有靚景既鯉魚門渡假村。一去到，嘩，乜咁靚既～～～可惜唔係住既。

入到房～～～好似監獄咁。個人認為。

大棠渡假屋係獨立浴廁。唔駛同唔識既人SHARE。而鯉魚門係公用浴廁 －－不過係三間房共用兩套浴廁。幸好，我地去既時候，我地個邊得兩間房有人住。所以，即係我地一家人可以專用一套，唔駛同人爭。不過好衰唔衰，之前住大棠，撞正爆水管，緊急維修到半夜至有涼沖。呢日無爆啦，到細路沖涼時，開好耐都無熱水。整鬼，原來係熱水壞左。搞到小朋友又係成身臭汗去瞓覺。真係有無咁岩呀，住兩次渡假村，兩次都無涼沖。爸媽就等工作人員維修好個熱水爐，我地至沖。好在唔係夏天，否則實好難捱臭瞓覺。

傳聞好靚景既鯉魚門～～～係我地住個層－－－既走廊盡頭可以見到 －－－ 亦即係其實我地係個村裡邊周圍行，都唔會見到靚景囉。除非成日企係條宿舍走廊。

唔知點解我地會執左個望遠鏡出門既呢～～～Claire 一落樓，就拎住個望遠鏡行路。

Claire: 咦～～我見到媽咪呀⋯⋯哈哈哈。

 入營時搞哂手續，拎哂營牌，見到原來呢日平日，無乜活動可以玩架咋。繩網無得玩，唯有玩下呢個成年無玩過既吊架啦（其實只不過一年前學校旅行坐過一次咁大把）

第一個上去，係一向作風大膽既Claire。佢應該都係觀望緊架咋，睇佢頭昂昂向上望，諗緊呢個係乜東東～～～反而哥哥呢日唔敢玩。

最鐘意就係見到仔女笑得咁開心懷。

Claire: 我呢個叫怕羞笑容呀～～

Claire: 哇～～～做乜FING起我呀⋯⋯⋯⋯

 吊架過程按此 睇得出Claire 幾咁冧個爸爸。

吊架對出係跳飛機。Claire 見哥哥跳，佢又要跳埋一份。都好似有板有眼既。

原來鯉魚門渡假村前身係抗日軍營黎架。同柴灣個邊既海防博物館係呼應，當時一邊負責防守海岸打仗；而呢度就係當時軍人住既地方。唔怪得無啦啦係營地有架坦克車既物體啦。

我地玩完吊架跳飛機，即轉移陣地，落返去大球場個邊（其實都唔大，不過係個度叫做大囉）踩單車玩下波咁。

Claire: 媽咪，準備接波。

Claire: 嘩，波呀波，你唔好走呀～～～

 玩完籃球轉玩排球。不過唔係手打，係手掟。

Claire: 哎呀～～～唔好走呀⋯⋯

 係大球場個邊消耗左大量體力後。臨近食飯時間，我地又試玩一陣羽毛球。其實旨在係想教哥哥打羽毛球，不過Claire 又要打埋一份。

Claire: 你睇我吖，我應該打到架。 

Claire: 哥哥，你睇下我吖。

Claire: 好，等我集中精神開波～～

Claire: 你睇我金精火眼，就知我實掟到羽毛球啦。

 玩左陣，我地還拍，Claire 發揮佢能幹本色，幫手還拍，一手拎起D拍同波，認真叻女。

大棠有幾個兒童遊戲室，內裡設備簡陋。估唔到，鯉魚門仲簡，得一個兒童遊戲室，裡邊既墊已經薄到同無係無乜分別，玩具又少又爛又亂。真係得個樣。

裡邊有架咁細既車仔，但係唔平既墊上，可以點推呢？

搞左一輪，夠鐘去飯當等開飯。網上傳聞呢間飯堂而家已經摺左，渡假村內係無野食。鬼咩，我地去個時，個地黑到不得了，好污糟。等到夠鐘開飯，D餸一拎出黎，係近乎凍既。膠水杯內有黑菌邊⋯⋯換另一個啦，又一樣有黑菌邊，真係無眼睇。合埋眼飲埋落肚算。

飯後見仲早，我地係服務處借左D玩具玩下。Claire 當係朱古力，係咁扮售貨員，要媽媽買。

鯉魚門渡假村最好，應該係呢台免費既氣墊球。不過媽媽嫌佢太大聲。細路仔玩一陣耳都比埋佢。

睇Claire 幾咁專心，一心要推個波入對方到。我地前前後後，淨係呢晚都玩左有大半個鐘呀。相比冒險樂園要比錢玩幾分鐘，我地呢度都抵返條數了。

玩到攰哂。諗住八點半返房沖涼。點知係惡夢開始 －－ 居然無熱水。細路梗係無所謂，照瞓可也。我地大人就要等工作人員黎搶修。唔知下次再租渡假屋，會唔會又遇著無水沖涼呢？