首次約同學仔去玩

5 Dec 14 呢日生日會放早，媽媽約左Claire 同學仔出黎玩。呢次係Claire 咁大個女，首次同佢自己同學去玩咋。一放學，幾隻馬蹓即飛奔去遊樂場。好明顯班細路，有得玩就乜都唔理，連同學仔跌低左，Claire 都只係擰轉面望一望，跟住齊齊跑走左。真係睇見都笑死。好明顯一副：啋你都傻既態度。

按此查看片段

跑咁快，就係要玩遊樂場。

玩完一輪，齊齊行去食飯。不過離開遊樂場之前，先影個合照。但點解有個小朋友扮老虎既呢？

Claire: 嘩～～～
童童： 吓～～好驚呀⋯⋯

童童： 媽咪⋯⋯恩恩好恐怖呀！
叡叡：睇下⋯⋯嘩，又真係幾恐怖喎。

自從係學校扮老虎講故事後，Claire 次次影相，都七情上面扮返老虎，真係扮老虎扮到上腦。

Claire: 嘩～～～

Claire: 嘩⋯⋯我要食你
童童： 唔好呀～～
叡叡： 唔驚啦，哈哈，佢扮架咋。

搞完一輪，幾個變返正經影張合照。唔知三年後，大家讀K3時，仲會唔會咁搞笑呢？

 食完飯，Claire 係商場見到公仔，又要影相喎。同學仔見到，又要影埋一份。三個企埋一齊，明明Claire 係最細粒，但點解似變左大家姐咁架。