踩單車去新公園放電

16 Nov 14 呢日爸爸仲未返香港，媽媽見天氣咁好，索性帶兩兄妹踩單車返教會。回程時，去一下呢個都幾僻既公園玩下。呢個公園，其實係屯門河另一邊，附近都無乜住宅，最近既住宅，可能係龍逸村。但龍逸村又有公園架喎。之前路經見呢個公園幾新淨又少人，所以媽媽係有計劃而黎。

放低兩架單車，兩兄妹已經急不及待去玩，一高一矮，差D睇唔到阿妹都係入左鏡TIM。

 呢日其實熱到暈左～～～大家都除哂衫，淨返件底衫。

咁曬既天氣，難得兩兄妹不停放電，都難為媽媽乾曬又熱住咁等。但呢個公園真係堅新同乾淨。所以，我地下次有機會，會再黎呢個咁少人既公園放電玩餐飽。

美中不足係，呢個公園距離屋企都幾遠下，兩兄妹朝早踩完半個鐘單車急速返教會，跟住又由教會再踩去呢度都要十分鐘，放埋電，踩返屋企又要廿分鐘，未到屋企，真係腳都軟埋。個肚餓到打哂鼓架。對兩兄妹黎講，算係劇烈運動黎掛。