2015年首次去沙灘

2 Apr 15 復活節假期，工人離職後第一個學校長假。媽媽唔想因為無左工人，令到小朋友生活有改變，所以，第一個學校假期，媽媽見天氣又唔係咁熱，一於自告奮勇，一個拖兩個去沙灘玩。

每次去沙灘，一開始，Isaac 就係咁既樣，一副好怕污糟但又想玩沙既姿勢。

不過唔駛幾耐，就會開始踎低，但個PAT仲係離地既。

反觀，Claire 就無理有理，一個PAT坐落去開始玩。

Claire: 媽咪，快D一齊玩啦。

Isaac: 不如你幫我筆沙吖。我驚整污糟呀。

Claire: 都唔好玩既⋯⋯哥哥唔敢同我一齊玩沙。媽咪又掛住影相。

Isaac: 媽咪呀，好攰呀⋯⋯不如一齊砌城堡啦。

媽媽兩兄妹三人一齊砌兩個城堡，殊不知，兩隻馬騮話咁快四腳踩平，想點⋯⋯

好在踩爛完城堡，Isaac 開始玩到忘形, 終於肯PAT PAT坐沙，忘形地玩沙。

呢個小妹妹做緊乜呢？

Claire: 吖～～你唔好偷影我呀～～

去沙灘，兩兄妹其實最鍾意踢水。

難得影到張咁齊心既踢水照。

懶有動感既一張，連踢起既水花都影得一清二楚。

Isaac: 哎呀～～有水呀～～好驚整到我塊面呀⋯⋯
Claire: 嘩，好好玩呀，快D繼續踢啦。

玩水玩到濕哂，一上岸，Claire 就會發現坐沙仲過癮。因為成腳都係痴滿沙。

Isaac: 媽咪，睇下我幾勁，我對腳全部都係沙呀。

玩完沙，媽咪最忙，要幫兩兄妹善後沖身沖玩具沖蓆。不過原來忙下忙下，其實自己一個人都應付到，唔駛怕無左工人。特別多謝兩位懂事小朋友，沖乾淨企埋一邊唔會亂走，等媽媽可以安心搞其它野。

搞完一輪，兩兄妹見到有個公園仔，又話要玩一陣。

Claire: 媽咪，哥哥唔比我落去呀～～

Claire: 媽咪，你一唔一齊玩呀？

其實呢個公園細到乜咁，不過兩兄妹真係玩開有癮，係公園都唔放過。

返屋企媽媽搞完清理後，一齊出去食飯。路過呢個公仔牌，兩兄妹話要影相喎⋯⋯其實有乜得意呢？

Isaac: 你唔覺得我好得意咩？