初次體驗RYZE

9 Apr 15 自從去年暑假RYZE開張後，媽咪都好想帶兩個小朋友去跳下。不過個時約好哂哥哥同學仔，忽然間同學仔之間話怕意外，個個都取消⋯⋯卒之，等到一年後的復活節，媽媽又癮起，好，去跳下先。山長水又遠，特登六點幾起身，仲要鏟埋兩個小朋友，飛的去婆婆屋企。因為佢樓下有村巴直去銅鑼灣。話咁快，八點幾就到左銅鑼灣了。食埋個早餐，再搭地鐵，上到RYZE岩岩好九點。YEAH。

點解晨吉咁早去？因為RYZE平日朝早九點至十點，係幼兒專區，只限六歲以下小朋友入場。咁計法，危險極有限啦，同埋至少無咁迫先。仲有仲有，咁早去，媽咪同兩個小朋友一齊玩，只係180元咋喎，媽咪係FREE既。好到不得了。咁梗係寧願早起去玩啦。

呢條斜波彈床，比兩兄妹當左滑梯？

Claire: 點解射唔到波既？？

Claire: 睇下我拎住個波坐跑架，今次應該射得入。

RYZE話大唔話，雖然係平日晨吉咁早，但人數比想像中多。實在好難想像幼兒時間過後，個場有幾咁旺，一陣比無情力撞低，咪話唔傷。呢度除左彈床，仲有堆海綿比人跳落去。

Claire: 好好玩呀，軟綿綿架⋯⋯

跳完海綿堆，又繼續去掟波。

嘩，呢個貞子係邊位黎呀⋯⋯

Claire: 搞錯呀，影下我呢張跳起既美女圖好過啦。

Claire: 再影埋我D核突樣，我就唔鍾意你呀下。

睇黎，呢個場，好似掟波吸引D喎。難怪既，平時都有得去跳彈床，但平時無得係彈床上玩波。唔怪得Claire 係咁拎波玩啦。

之後，我地由朋友帶路，行左去消防船。略略參觀左一陣。睇下，骨子裡男仔頭既Claire 點擺POSE。

參觀完，我地又由朋友帶路，去左鰂魚涌公園玩。就係咁，係公園玩左成個鐘有多。坐係呢條滑梯，仲成個BB樣既Claire. 

公園呢度，最吸引係呢架搖搖船。兩個係咁揾人上船坐，扮開船。

呢個BB千秋周圍有，唔見特別。不過Claire 有愛佢既哥哥幫手推，就零舍幸福。

Claire: 好開心呀，哈哈哈⋯⋯繼續吖⋯⋯哥哥⋯⋯

嘩，睇Claire 玩得幾咁開心，好明顯哥哥好錫佢，係咁推妹妹，自己唔去玩。

玩完一輪，我地又返出銅鑼灣揾野食。食完飯，巡例去影下巨型機械人。但當時Isaac 好似無乜興趣咁，只係同IRONMAN影完就即走。

Claire: 好明顯哥哥有興趣同我玩多D啦。

Claire: 哥哥，多謝哂你呀，我錫你一啖吖⋯⋯

呢個，就係我地係銅鑼灣食LUNCH之後既甜品了。以為Claire 會食唔停口。點知，佢當時仲係好細食，只係食一兩舊就停哂手。

Claire: 嘩⋯⋯好味呀⋯⋯雪糕⋯⋯不過我好飽。可唔可以淨食雪糕⋯⋯

呢日，係媽咪無左工人後，第一次一個帶住兩個小朋友去到咁遠，仲要搞掂兩餐。成日流流長，返到屋企都五點，媽咪覺得好厲害呀。咁又一DAY了。原來，自己帶孩子都唔係想像中咁泥HEA。