我四歲了

1 Apr 2015 話咁快，又到四月一愚人節。即係又係阿囡出世生日既日子。我地生日好特別，唔會特別請假去玩。所以，呢日日頭，我地好平常咁過⋯⋯當媽媽忙緊時，忽然見到Claire 好有創意好得戚咁同媽媽講： 我畫幅畫比你吖⋯⋯

無錯，佢話自己畫緊畫。但點解係用葯膏黎做材料架？仲有仲有，點解係用外賣匙同埋個張紙巾架⋯⋯媽媽睇到O哂咀。之但係咁，呢一刻，媽媽無鬧佢，只係心諗，都算係一種創意黎既⋯⋯然後比呢張相畫班老師睇，畫班老師讚妹妹有創意。老師細個都係咁搞亂檔架喎。哈哈哈，唔通Claire 大個會當畫畫老師？

搞亂檔後，我地又齊齊出去玩玩放電。屋企幾時多左兩隻馬騮架？？！！

夜晚等到爸爸放工，我地終於切生日旦糕了。呢個HIPPO係雪糕旦糕黎。

Claire: 嘩，好似好好味咁喎⋯⋯我想快D切呀！

Claire: 多謝爸爸媽媽。
媽媽： 多謝妹妹你黎呢個世界做我地既囡囡。日日帶比我地歡樂同激心。希望你快高長大，聽教聽話至真。

話咁快就四歲，仲記得當年今日，係產房點過。仲記得一出世，爸爸好大聲話Claire 吹住口水波波同爸爸見面。仲記得生完阿囡一刻，自己暈到黑漆漆乜都睇唔到，好辛苦至撐大眼睇到個囡。仲記得出世之後到呢日，呢個衰妹仲係練仙乜都唔食，唔知想點。

唔知出年生日，Claire 有乜轉變呢？