首次親子運動會

17 Apr 15 哥哥係呢間幼稚園讀左三年，都未試過有親子運動會。估唔到Claire 第一年，就遇著親子運動會。好在，地點都好近，係兆麟運動場姐。不過就好熱，好曬。我地都幫Claire 自動換左夏季運動衫，免得熱親。

一入場，見到兩個好朋友，三個小朋友唔駛教，自自然然都手拖手。

Claire: 我地都好興奮呀～～ 

Claire: 哎呀，你唔好郁手郁腳啦。斯文D啦⋯⋯

 第一次參加運動會，好在，大家都唔駛悶好耐。因為三年級各同學係分兩次出場。第一次係個人比賽。

Claire: HM⋯⋯唔知我會唔會贏呢⋯⋯

其實，以Claire 當時情況黎講，佢係可以SURE WIN既⋯⋯如果佢雙膝掂地爬的話。可惜佢以為上緊體操堂，就用左平時慣左既雙膝離地去爬，咁梗係慢過人啦。

Claire：睇下你地係咪快過我先。

（按此去片觀看個人賽片段）

跑呀⋯⋯

跑完，齊齊去領奬。

原來係人人有奬，永不落空。一班傻豬仔不知幾咁高興，個個以為自己都有奬拎。哈哈。

睇下呢班人仔，更加顯得Claire 細粒。

爸爸： 黎，阿妹，同爸爸影張相先⋯⋯
Claire: 哎呀⋯⋯唔好攬咁實啦，其它男仔識唔到我架啦⋯⋯

係個人賽之後，輪到其它班級比賽。而呢個時候，小朋友就係後台自娛。

好明顯個個小朋友一上台，就被迫擺個V字手勢啦。

連Claire 都不甘示弱。

Claire: 好野，我有奬拎⋯⋯

Claire: 如果呢塊係塊朱古力，咁就好囉。呵呵⋯⋯

Claire： 唉，又要影呀？？唉⋯⋯應酬下你啦，V⋯⋯
童童： 上緊鏡架，斯文D啦⋯⋯

Claire: 咁我斯文D啦⋯⋯嘩～～～（扮怪獸）
童： 咁我扮ELSA⋯⋯

童：我地真係好夾既姐。。
Claire: 你望鏡頭先吖⋯⋯

Claire: 爸爸，幾時到我地親子比賽呀？

終於到K1親子比賽時間。原來係分組進行既。姐係，輸左唔關自己事⋯⋯可惜，我地真係輸左⋯⋯因為同組有個媽媽，一開始大模施樣行CATWALK咁慢慢執返自己副眼鏡⋯⋯慢慢行，累全組一齊落後，唉⋯⋯

未開始前既四萬笑容。

Claire: 前面個家長咁慢⋯⋯實輸啦。

爸爸： 唔緊要呀。我地跑快D，睇下救唔救到囉。

最後，梗係救唔到啦，因為個位家長，實在當自己行CATWALK咁。真係睇見都有火。只能當作佢聽唔明廣東話，亦都唔知今次係運動會。

Claire: 哼，我咁落力，都輸⋯⋯

賽後，Claire 同同學仔係場上搏命跑，散盡電。

睇相，就知小朋友係唔驚曬溶。哈哈。

雖然早上熱左半日，應該都幾攰下。不過，Claire 繼續踩下場，就係同朋友仔去會所玩⋯⋯不過，睇下佢對眼⋯⋯

Claire: 唉⋯⋯我唔眼瞓⋯⋯

Claire: 我都唔係好眼瞓姐⋯⋯

據說，同行朋友仔，一返到屋就昏迷⋯⋯而Claire 呢，離開會所後，仲要去畫畫⋯⋯捱到晚飯後，按正常時間瞓覺。可以理解到，點解Claire 咁細粒啦。

Claire: 我衝呀⋯⋯