展我繽紛繪畫比賽 2013 ﹣﹣幼兒組銅奬

4 Aug 13 呢日就匆忙囉， 話說我地一早答應左同學仔出席生日會， 時間係兩點。之前個日就全日要綵排表演唱歌。早兩周至知 Isaac 繪畫比賽攞奬， 會係3號及4號兩日係尖沙咀文化中心展示作品加拎奬狀。嘩， 三號去表演， 即係出到咁遠既文化中心睇作品， 得四號。但下午要去生日會， 即係朝早晨咁早出文化中心， 再趕返屯門。

再早D， 媽媽要先去老師屋企拎返張奬狀， 因為老師三號幫我地集體拎哂了。拎完返屋企再同小朋友出尖沙咀。

點知有人依然繼續發老四， 唔肯影。幾經辛苦， 至肯同呢張BANNER影， 但就黑哂塊面。

係爸爸至氹到 Isaac 指住自己幅畫影一張。

又幾經辛苦， 至氹到 Isaac 同自己作品加埋張奬狀影返一張～～～幼兒組銅奬。

媽媽覺得好叻呀。轉左呢間畫室， 第一次畫既呢幅畫， 拎出去參賽， 拎到個銅奬。不愧自一歲自己拎住支筆塗鴉的 Isaac， 希望呢個奬， 令佢更有信心繼續畫。

之前就板起塊面， 影到走個時， 就開始整古做怪， 小朋友真係難捉摸。