銅鑼燒 ／ 紅豆餅 （附食譜）

之前係12蚊店， 買左一罐紅豆看門口， 因為仔仔鐘意食紅豆， 一心諗住一係整紅豆包， 一係整銅鑼燒。買左呢個病下個個又病下， 病到呢幾日至停哂。好， 開左罐紅豆先， 唔係一陣放到過期。

12蚊店的罐裝紅豆好似得一兩隻， 我選左少甜～～～話少甜， 其實我撩左一粒黎食， 甜到爆～～～～即刻摷屋企的剩餘紅豆出黎用熱水浸一個鐘（用熱水可以加速快D浸完拎去煲）。之後又煲到淋哂。兩溝， 嘻嘻， 咁都比我諗到， 覺得自己醒到不得了。之前試過自製紅豆粒，唔敢落糖，難食到不得了。反而今次買一罐即食日本紅豆， 溝自己煲既紅豆粒， 可以中和返， 無咁甜， 仲可以多D TIM。

罐裝紅豆先隔杰撻撻的汁出黎， 加已煲好的紅豆粒， 一齊慢火煮炒收水， 邊炒邊攪。煮到收水咁滯， 倒埋之前隔出黎既罐頭紅豆粒入去一齊煮。直至完全杰無水為止。   變左咁。一罐紅豆溝幾多自己煮既紅豆粒， 我無量， 適隨尊便吧。多左豆咪加返多少少水， 少左豆既，咪煮耐少少囉。總之煮到杰， 咁搽落塊餅到， 唔會淋哂咁。

銅鑼燒材料：
紅豆蓉  適量
室温旦  兩隻
黑糖      50G （可用白砂糖代替， 但黑糖煎出黎， 個色靚D）
蜜糖      30G
牛奶      80G
低粉      130G
泡打粉  1茶匙

做法：
1）先打發兩隻旦至起泡， 再分兩至三次下糖， 至泡細密。


2）慢慢注入暖牛奶拌勻， 再加入蜜糖攪勻。
3）篩入低粉泡打粉攪勻。攪既時候仲有泡架。
4）由得佢靜止半小時。半小時後下平底鑊煎。煎前要用抺手紙抺少許油在平底鑊上（我發覺唔駛每塊都落， 有需要， 發覺煎到某塊色澤唔好時， 再抺下油就得）。一定要用小火煎。中火好快燶。唔好貪快呀， 我試過煎煎下實驗用下中火， 即燶。之後聽聽話話企係廚房用返細火算。

5）重要一點：開始煎的過程， 用緊同一隻匙注入漿會使到煎出黎的餅都大小一致。至於圓形呢， 仲易， 就係注入漿至鑊時， 見漿落到鑊個刻， 隻手要定形啦， 唔好郁， 由得漿由中間點向四圍展開， 而匙裡未流到鑊的漿， 會繼續係第一個落鑊點流落去， 把餅漿繼續伸展至圓形的。所以唔駛用模或者切割器。總之隻手一倒漿就玩木頭公仔唔郁， 直至匙裡的漿流哂為止。
6）靜心等候塊餅現哂洞， 代表夠時間反轉。記住要咁多洞至反， 太早反， 我本人的鑊同火就唔夠喉， 色澤唔靚仔。反轉後， 我習慣一反即放鑊邊， 咁鑊中間再倒入新漿煎第二塊。慳返時間。至於反面， 我由得佢放鑊邊， 直至中間新一塊， 起哂洞洞， 我就夾起鑊邊一塊， 然後反中間一塊又放鑊邊。如是者重覆咁做。 以上既材料， 煎足廿二塊左右， 煎足我一個鐘。呢味唔難做， 難在要耐性， 係我覺得最難既一樣。係廚房流一個鐘汗， 都咪話。

攤涼後， 可以適隨尊便塗上紅豆蓉。

包裝好， 送禮氹下大人小朋友都開心架。