再戰天暉路體育館室內兒童遊戲室 ／天瑞體育館兒童室內遊戲室

12 Aug 13 趁妹妹開學前最後出擊， 我地呢日一早起身又再戰體育館室內遊戲室。天暉路室內兒童遊戲室咁大， 我地上次都玩到好開心， 講明呢日再去， 所以，起身即出去。Isaac 見到呢個大山， 又爬左上去， 因為媽媽話影比同學仔睇喎。
其實我地玩左三分鐘就清場， 要再等入去。趁等既期間， 度下高先。嘩， Isaac 不經不覺超過110CM了， 究竟係真唔係呀

好， 等左十分鐘， 又入得去玩。

不過呢節我地又玩左十分鐘， 媽媽忍唔住要走， 因為壞冷氣。一入去成陣味， 二來又怕焗到好多菌容易病。三來無冷氣， 好快玩到濕哂。所以， 我地玩一陣就轉左陣地， 去天瑞體育館玩。因為天瑞體育館室內遊樂室， 都叫做天水圍第二大既室內遊戲室吖嘛（其實得個六百幾呎， 無野可玩）

呢次， 係 Isaac 第二次黎天瑞體育館了。第一次應該係一歲多DD。嘻嘻。今次黎， 牛高馬大。一野就衝左去爬牆。

Isaac: 媽咪， 你睇下

天瑞體育館室內遊戲室主題係太空世界。所以圖案都係太空為主。不過， 三年無黎， 乜都殘哂LU。

四歲幾既 Isaac 做乜爬牛牛， 學BB呀。

扮完BB變身超人， 橫衝直撞跳黎跳去。

當正呢度係彈床咁。

Isaac：嘩， 我衝呀～～～

Isaac: 唏～～個度有壞人， 我射佢

扮完超人， 比媽媽呃左佢入浴缸扮沖涼。

叫佢扮美人魚， 又真係七情上面， 有埋姿勢架喎。正。第時上DRAMA 班實無蝕底。

Isaac: 我似唔似海棠春睡呀？

呢間天瑞體育館室內遊樂場， 兩年幾前黎， 好多人， 玩完一轉無得再玩（因為要排多過一節時間）。呢次平日朝早去， 諗住少人啦， 點知一樣多， 真係怕怕。每節入場人數包埋家長， 只得12人。唉。仲要管理員係個節人地玩緊， 未夠鐘出黎， 就已經早十五分鐘派下一節飛， 先問相熟師奶阿婆個D要唔要。我地係入邊玩緊呢， 基本上你玩完25分鐘一節， 出去再拎飛， 對唔住， 無飛囉喎。真係迫人每節玩十分鐘， 跟住出返去企門口拎佢張飛又企門口等十五分鐘等到當節完為止咩。我地最後一節就係咁， 玩十分鐘， 好， 要再玩吖嘛， 唔該出哂黎拎飛， 呆坐門口等到明明玩緊個節完場， 再入去。好無癮姐。姐係每次玩十分鐘， 為左可以再玩， 又出去排15分鐘（每節25分鐘， 但當日係嬸嬸係個節提早15分就散哂下一節飛）。所以， 玩左三節， 媽媽一肚氣拉兩兄妹走人。醫肚。再戰屏山室內遊樂場算。總之， 呢間天瑞體育館室內遊樂場， 無下次。