蜜糖比目魚

之前係吉之島買左包比目魚。平時工人會日頭用黎白蒸， 或切碎蒸旦比阿仔食。都幾嘥， 一包比目魚都唔平架， 但阿仔越大越抗拒食魚， 真係要諗下計仔至得。

見呢日有MOOD， 想氹下阿仔食多兩啖， 所以， 親自下廚煮左味蜜糖比目魚。嘩， 兩兄妺爭住食， 媽媽真係開心。蜜糖係一味幾有用既煮食調味黎， 嘩哈哈。

其實呢味餸無乜調味架咋。係臨煮時， 落一湯匙蜜糖撈一撈。臨煎前， 抺些鹽係魚身， 落鑊煎香， 我無抺生粉，但都煎得唔差喎， 無甩骨。煎好後撈起。用老抽（上色用， 可以唔用），生抽， 生粉同鹽加些少水， 煮滾後收細火， 落兩湯匙蜜糖一齊煮。落埋條魚落去。略煮一陣入味咁就食得。係咪好方便快趣呢。

調味詳情無記， 因為煮餸， 一向講感覺經驗。煮得多自然識下幾多豉油糖個D。汁煮多左咪唔好要， 少左咪加多少少豉油同蜜糖， 無相干。總之好一碟易煮又氹到小朋友的餸黎。